چیمپئینز ٹرافی،آن لائن ٹکٹ فروخت کرنیوالی سائٹ کے سرورز جواب دے گئے

لاہور:چیمپئنز ٹرافی کے ٹکٹوں کی آن لائن فروخت کے آغاز پر ویب سائٹ پر غیر معمولی ٹریفک کے باعث سرورز بند ہوگئے، جس سے شائقین کو ٹکٹوں کی خریداری میں مشکلات کا سامنا ہے۔
میڈیا رپورٹس کے مطابق، پاکستان کی میزبانی میں ہونے والے اس ایونٹ کے ٹکٹوں کی فروخت شروع ہو چکی ہے، اور کرکٹ فینز کی جانب سے ٹکٹ خریدنے کے لیے زبردست جوش و خروش دیکھا جا رہا ہے۔
آن لائن ٹکٹنگ ویب سائٹ پر بڑھتی ہوئی مانگ کے باعث سرورز جواب دے گئے، جس کی وجہ سے خریداری کا عمل متاثر ہوا۔ اس تکنیکی مسئلے کے باعث شائقین کو ٹکٹ حاصل کرنے میں دشواری پیش آ رہی ہے۔
آئی سی سی کے مطابق، پاکستان میں شیڈول گروپ میچز اور دوسرے سیمی فائنل کے ٹکٹوں کی عام فروخت 28 جنوری بروز منگل سے شروع ہوگی۔ پاکستان میں ہونے والے گروپ اسٹیج مقابلوں اور دوسرے سیمی فائنل کے ٹکٹ پاکستانی وقت کے مطابق دوپہر 2 بجے فروخت کیے جانے تھے۔
کراچی، لاہور اور راولپنڈی میں ہونے والے 10 میچوں کے لیے مختلف کیٹیگریز میں ٹکٹ دستیاب ہوں گے، جن میں جنرل اسٹینڈ کا ٹکٹ 1000 روپے سے شروع ہوگا۔
چیمپئنز ٹرافی کا انعقاد پاکستان میں 19 فروری سے 9 مارچ تک ہوگا، جبکہ بھارت کے میچز متحدہ عرب امارات میں کھیلے جائیں گے۔
دوسری جانب، روایتی حریف پاکستان اور بھارت کے درمیان دبئی میں ہونے والے میچ کے ٹکٹوں کی فروخت کے حوالے سے بعد میں اعلان کیا جائے گا۔ شائقین پی سی بی، آئی سی سی اور نجی کوریئر کمپنی کی ویب سائٹ سے آن لائن ٹکٹ خرید سکتے ہیں۔