سام آلٹمین کی نئی بائیومیٹرک ڈیوائس "Orb Mini” انسان اور اے آئی میں فرق ثابت کرے گی

اوپن اے آئی کے سی ای او سام آلٹمین کی ایک اور کمپنی "ٹولز فار ہیومینٹی” نے ایک منفرد بائیومیٹرک ڈیوائس "Orb Mini” متعارف کرائی ہے، جس کا مقصد یہ تصدیق کرنا ہے کہ کوئی فرد حقیقی انسان ہے یا مصنوعی ذہانت کا تخلیق کردہ ماڈل۔ دیکھنے میں یہ ڈیوائس ایک چھوٹی دھاتی گیند جیسی لگتی ہے، جو آنکھوں کو اسکین کرکے ایک منفرد شناختی نظام تیار کرتی ہے جسے "ورلڈ آئی ڈی” کا نام دیا گیا ہے۔

یہ شناختی نظام بلاک چین ٹیکنالوجی پر مبنی ہے، جو اس بات کی تصدیق کرتا ہے کہ متعلقہ فرد ایک اصل انسان ہے، نہ کہ کوئی ڈیپ فیک یا اے آئی تخلیق۔ کمپنی کا دعویٰ ہے کہ آنے والے وقت میں جب مصنوعی ذہانت کی تخلیقات مثلاً کتابیں، ویڈیوز اور آوازیں عام ہو جائیں گی، تو یہ اسکینر انٹرنیٹ کی دنیا میں انسان اور مشین کے درمیان فرق واضح کرنے کے لیے ناگزیر ہو جائے گا۔

یہ ڈیوائس سائز میں چھوٹی اور پورٹیبل ہے، جسے کہیں بھی آسانی سے لے جایا جا سکتا ہے۔ "Orb Mini” کسی بھی جگہ پر آنکھوں کا اسکین کر کے چند لمحوں میں شناختی عمل مکمل کر سکتی ہے۔ کمپنی کا کہنا ہے کہ یہ ڈیوائس پرائیویسی کا مکمل خیال رکھتی ہے اور آنکھوں کی تصاویر یا دیگر حساس ڈیٹا کو اسٹور نہیں کیا جائے گا۔ ٹولز فار ہیومینٹی نے 2025 کے اختتام تک امریکہ میں 7,500 اسکینرز فراہم کرنے کا منصوبہ بنایا ہے۔ سام آلٹمین کا مؤقف ہے کہ مستقبل میں انٹرنیٹ پر شناخت کا قابلِ اعتماد طریقہ کار ضروری ہو گا، اور یہ ٹیکنالوجی اس کی بنیاد فراہم کرے گی۔