سیکیورٹی اپڈیٹ کی خرابی سے مائیکروسافٹ سروسز عالمی سطح پر متاثر
سیکیورٹی اپڈیٹ کے بعد مائیکروسافٹ سسٹمز میں خرابی عالمی سطح پر کمپیوٹرز متاثر
واشنگٹن: کراؤڈ اسٹرائیک، ایک معروف امریکی سائبر سیکیورٹی کمپنی، کی جانب سے مائیکروسافٹ سسٹمز کے لئے بھیجی گئی سیکیورٹی اپڈیٹ کے بعد ہونے والی خرابی دو دن گزرنے کے باوجود بھی ٹھیک نہ ہو سکی۔
کراؤڈ اسٹرائیک نے 19 جولائی کو مائیکروسافٹ کمپیوٹرز پر اپنے سیکیورٹی سافٹ ویئر (فیلکن سینسر سافٹ ویئر) کا اپڈیٹ بھیجا، جس کے بعد مائیکروسافٹ ونڈوز میں خرابی پیدا ہو گئی۔ اس خرابی کی وجہ سے دنیا بھر کے درجنوں بڑے اداروں کے کمپیوٹرز نے کام کرنا بند کر دیا۔
دو دن گزر جانے کے باوجود، کراؤڈ اسٹرائیک کی جانب سے نیا سافٹ ویئر اپڈیٹ بھیج کر مسئلہ حل نہ کیا جا سکا۔ ٹیکنالوجی ماہرین پہلے ہی بتا چکے تھے کہ یہ مسئلہ اب مینوئل طریقے سے ہی حل ہو گا، جس میں کئی دن لگ سکتے ہیں اور ہر ادارے کے اپنے ٹیکنالوجی ماہرین اس مسئلے کو حل کریں گے۔
خبر رساں ادارے رائٹرز کے مطابق، مائیکروسافٹ سروسز میں آنے والا خلل دوسرے دن بھی صحیح نہ ہو سکا، تاہم مختلف اداروں نے مینوئل طریقے سے اپنے سسٹمز کو ٹھیک کر کے کام کرنا شروع کر دیا۔
رپورٹ میں بتایا گیا کہ فیلکن سینسر سافٹ ویئر کے اپڈیٹ ورژن کی کوڈنگ میں خرابی کی وجہ سے مائیکروسافٹ سروسز میں خلل پیدا ہوا۔ ماہرین کا کہنا ہے کہ ممکنہ طور پر کراؤڈ اسٹرائیک کے ماہرین نے سافٹ ویئر کو بھیجنے سے قبل درست انداز میں چیک نہیں کیا، جس کی وجہ سے یہ خرابی پیدا ہوئی۔
مائیکروسافٹ سروسز میں خلل کی وجہ سے دنیا بھر میں بینکوں، ہوائی اڈوں، ہسپتالوں، ریڈیو اور ٹی وی اسٹیشنز، سرکاری دفاتر، ٹیکنالوجی فرمز اور ہوٹلوں سمیت دیگر اداروں کے کمپیوٹر سسٹمز متاثر ہوئے۔ اس خرابی کے باعث کئی گھنٹوں تک کام ٹھپ ہو کر رہ گیا۔
کمپیوٹر سسٹمز میں خرابی کی وجہ سے دنیا بھر میں کم از کم 3300 پروازیں منسوخ ہوئیں اور مزید پروازوں کے منسوخ ہونے کے امکانات بڑھ گئے تھے۔ برطانوی ٹی وی چینل اسکائے نیوز بھی اپنی براہ راست نشریات دکھانے سے محروم رہا۔
یہ مسئلہ ابھی تک مکمل طور پر حل نہیں ہو سکا اور ماہرین کا کہنا ہے کہ اسے مینوئل طریقے سے حل کرنے میں مزید وقت لگ سکتا ہے۔
