امریکی اخراجات بل منظور، سرکاری شٹ ڈاؤن کا خطرہ ختم

امریکی اخراجات بل منظور، سرکاری شٹ ڈاؤن کا خطرہ ختم

واشنگٹن: امریکی ایوان نمائندگان نے دو ناکام کوششوں کے بعد حکومت کے پیش کردہ اخراجات کے بل کو تیسری مرتبہ ووٹنگ میں بھاری اکثریت سے منظور کرلیا ہے۔
امریکی ذرائع کے مطابق بل کے حق میں 366 ووٹ ڈالے گئے جبکہ 34 اراکین نے مخالفت میں ووٹ دیا۔ اس بل کی منظوری کے بعد آدھی رات کو سرکاری شٹ ڈاؤن کا خطرہ ختم ہوگیا ہے۔ اگر بل کو مسترد کردیا جاتا تو فنڈز کی کمی کے سبب امریکہ کے تمام سرکاری ادارے آدھی رات سے بند ہوجاتے۔
منظور شدہ بل کے تحت حکومت کو مارچ 2025 تک ڈیزاسٹر فنڈ کے لیے 100 ارب ڈالر اور کسانوں کی مدد کے لیے 10 ارب ڈالر فراہم کیے جائیں گے۔ بل کو حتمی منظوری کے لیے اب سینیٹ میں پیش کیا جائے گا۔
ووٹنگ سے پہلے ریپبلکن اور ڈیموکریٹ اراکین نے خبردار کیا کہ سرکاری شٹ ڈاؤن کی اجازت دینا ایک سنگین غلطی ہوگی۔ دونوں جماعتوں کے سینئر رہنما عبوری بجٹ پیکیج پر متفق تھے تاکہ مارچ 2025 تک وفاقی اداروں کو ضروری فنڈز فراہم کیے جا سکیں۔