جاپانی حکومت کا کنواری لڑکیوں کی شادی کیلئے خصوصی پیکیج کا اعلان
ٹوکیو:جاپانی حکومت نے ایک نیا منصوبہ متعارف کرایا ہے جس کے تحت ٹوکیو کی غیر شادی شدہ لڑکیوں کو دیہی علاقوں میں شادی کے لیے ترغیب دی جائے گی۔ اس منصوبے کا مقصد دیہی علاقوں میں خواتین کی کمی کو پورا کرنا اور شادی کے لیے دستیاب دلہنوں کی تعداد میں اضافہ کرنا ہے۔
جاپان ٹائمز کی رپورٹ کے مطابق، حکومت کی جانب سے اس منصوبے کے تحت شادی کی خواہشمند لڑکیوں کے میچ میکنگ ایونٹس کے سفری اخراجات حکومت اٹھائے گی۔ اس کے علاوہ، ٹوکیو سے دیہی علاقوں میں منتقل ہونے والی خواتین کو 7 ہزار امریکی ڈالر تک کی مالی مدد فراہم کی جائے گی۔
جاپان کو حالیہ برسوں میں آبادی کے ایک بڑے چیلنج کا سامنا ہے۔ 2023 میں ملک میں شرح پیدائش کم ترین سطح پر پہنچ گئی، جہاں صرف 727,277 بچے پیدا ہوئے اور شرح پیدائش 1.20 رہی، جو کہ مستحکم آبادی کے لیے درکار 2.1 سے بہت کم ہے۔
حکومت نے گرتی ہوئی آبادی سے نمٹنے کے لیے کئی اقدامات کیے ہیں جن میں جوڑوں کو بچے پیدا کرنے کے لیے مالی مراعات اور بچوں کی دیکھ بھال کی سہولیات کی فراہمی شامل ہے۔ حتیٰ کہ ریاستی حمایت یافتہ ڈیٹنگ ایپ بھی متعارف کرائی گئی ہے، جو کنوارے مرد و خواتین کو ملانے میں مدد فراہم کرتی ہے۔
جاپانی وزیراعظم نے اس بحران کو ملک کے لیے ایک سنگین ترین چیلنج قرار دیا ہے اور اس مسئلے کے حل کے لیے بھرپور کوششوں کی ضرورت پر زور دیا ہے۔
