مکہ مکرمہ (ایم وائے کے نیوز) — مسجد الحرام کے امام و خطیب شیخ صالح بن حمید نے عرفات کے میدان سے خطبۂ حج کے دوران امت مسلمہ کے مسائل کو اجاگر کرتے ہوئے فلسطینی عوام کے لیے رقت انگیز دعا کی۔
انہوں نے دعا کی: "اے اللہ! فلسطین میں ہمارے مظلوم بھائیوں پر رحم فرما، ان کی بھوک، مصائب اور تکالیف کا خاتمہ فرما۔ اے اللہ! ان کے بے گھروں کو پناہ دے، ان کے دلوں کو سکون دے، انہیں امن نصیب فرما اور دشمنوں کے ظلم و ستم سے محفوظ رکھ۔”
شیخ صالح بن حمید نے مزید دعا کی:
"اے اللہ! مسلمانوں کے حکمرانوں کو بھلائی کی راہ دکھا، انہیں ہدایت، عدل اور تقویٰ عطا فرما تاکہ وہ امت کی درست رہنمائی کر سکیں۔” خطبۂ حج میں شیخ صالح نے امت مسلمہ پر زور دیا کہ وہ صبر، اتحاد، تقویٰ، اخوت اور دین اسلام کی اصل تعلیمات پر عمل پیرا رہیں، اور مظلوموں کی مدد کے لیے دعا، اتحاد اور عملی اقدامات کو اپنا شعار بنائیں۔
واضح رہے کہ مسجد نمرہ سے نشر ہونے والے خطبۂ حج کا دنیا کی 35 سے زائد زبانوں میں براہِ راست ترجمہ کیا گیا، تاکہ دنیا بھر کے مسلمان حج کے اس عظیم پیغام کو اپنی زبان میں سمجھ سکیں۔
