کیلیفورنیا (ایم وائے کے نیوز ٹی وی) آئی فون 17 سیریز کی رونمائی کی ممکنہ تاریخ کا تعین کر لیا گیا ہے اور یہ رونمائی 9 یا 10 ستمبر 2025 کو ایک خصوصی ایونٹ میں کی جائے گی۔ ایپل ہمیشہ اپنے آئی فونز کی تقریب ستمبر کے مہینے میں منعقد کرتا آیا ہے، اور رواں برس بھی اسی روایت کو برقرار رکھنے کی تیاریاں جاری ہیں۔ تاہم اس بار ناصرف لانچ کی تاریخ اہم ہے، بلکہ جس ڈیوائس کو لانچ کیا جا رہا ہے وہ بھی کچھ مختلف، کچھ نیا اور کچھ سنسنی خیز ہونے جا رہا ہے۔
ذرائع کے مطابق اس بار ایپل کی آئی فون 17 سیریز میں سات ماڈلز شامل ہوں گے، جن میں کچھ ایسے نام اور ورژنز بھی ہوں گے جو پہلے کبھی سننے میں نہیں آئے۔ ان ماڈلز میں آئی فون 17، 17 ایئر، 17 پلس، 17 پرو، 17 پرو میکس اور ممکنہ طور پر الٹرا ورژن شامل ہوں گے۔ ایک نیا ورژن "آئی فون 17 ایئر” کے نام سے متعارف کرایا جا رہا ہے، جس کے بارے میں دعویٰ کیا جا رہا ہے کہ یہ اب تک کا سب سے پتلا آئی فون ہو گا۔
2020 میں آئی فون 11 کے بعد سے اب تک کیمرہ ڈیزائن میں کوئی بڑی تبدیلی دیکھنے میں نہیں آئی، لیکن اس بار ایپل بیک کیمرہ کو مکمل طور پر نئے انداز میں پیش کرنے جا رہا ہے۔ روایتی اسکوائر کیمرا سیٹ اپ کی جگہ اب گوگل پکسل کے پل (pill) بار کی طرز پر ایک نیا، لمبا اور افقی ڈیزائن متعارف کرایا جا رہا ہے۔ یہ نہ صرف ظاہری ڈیزائن میں انقلابی تبدیلی ہو گی بلکہ کیمرا پرفارمنس میں بھی نمایاں بہتری لانے کی امید ہے۔
اس بار سامنے والے کیمرے میں موجود ڈائنامک آئی لینڈ فیچر کو بھی دوبارہ ڈیزائن کیا جائے گا اور اسے مزید انٹریکٹو اور ہموار بنایا جائے گا۔ اس کے علاوہ، A19 چپ کے ساتھ فون کو غیر معمولی اسپیڈ اور پاور ملنے کی توقع ہے، جو کہ ملٹی ٹاسکنگ، گیمنگ اور پروفیشنل استعمال کے لیے ایک نیا معیار قائم کرے گا۔ آئی فون 17 ایئر کے بارے میں خاص طور پر یہ دعویٰ کیا جا رہا ہے کہ یہ ماڈل نہایت پتلا، ہلکا اور جدید طرز پر بنایا گیا ہے، جس کے بیک پر صرف ایک کیمرا ہوگا، جو ممکنہ طور پر 48 میگا پکسل کا ہوگا۔ اگرچہ فیچرز کے لحاظ سے یہ پرو یا پرو میکس سے کم ہوگا، لیکن ڈیزائن اور ہینڈ فیل اسے الگ مقام دلائے گا۔
فاسٹ میگ سیف چارجنگ کا نیا ورژن بھی اس سیریز میں متعارف کروایا جائے گا، جس سے فون کی بیٹری چند منٹوں میں کافی حد تک چارج ہو جائے گی۔ اس کے ساتھ ساتھ اسکرین کے برائٹنس لیول، ریفریش ریٹ اور پائیداری میں بھی بہتری لائی جا رہی ہے۔ قیمتوں کا باضابطہ اعلان نہیں کیا گیا، لیکن امکان ظاہر کیا جا رہا ہے کہ نئے ماڈلز کی قیمت میں کچھ اضافہ ہوگا، خاص طور پر پرو ماڈلز کے لیے۔
ایپل کی جانب سے آفیشل دعوت نامے جلد جاری کیے جانے کی توقع ہے، اور پھر یہ بات طے ہو جائے گی کہ کون سا ماڈل کب اور کہاں دستیاب ہوگا۔ تاہم ابھی سے ایپل شائقین کی نظریں ستمبر کی جانب مرکوز ہو چکی ہیں، جہاں ایک بار پھر ٹیکنالوجی کی دنیا میں ایک نیا باب کھلنے والا ہے۔
