کراچی میں کم عمر بچی سے اجتماعی زیادتی، 2 ملزمان کو دو، دو بار عمر قید
کراچی: ایڈیشنل سیشن عدالت جنوبی نے کم عمر گداگر بچی کو راشن کا جھانسا دے کر اغوا کرنے اور اجتماعی زیادتی کے کیس کا فیصلہ سناتے ہوئے 2 ملزمان کو دو، دو مرتبہ عمر قید کی سزا سنا دی۔
عدالت نے جرم ثابت ہونے پر ملزمان غلام رسول اور خالد کو دو، دو بار عمر قید کی سزا سنائی، جبکہ دونوں ملزمان کو متاثرہ بچی کو 5، 5 لاکھ روپے معاوضہ ادا کرنے کا بھی حکم دیا۔
پراسیکیوشن کے مطابق 2022 میں ملزمان نے کم عمر گداگر بچی کو راشن دینے کا جھانسا دے کر اغوا کیا اور سی ویو کے قریب اس کے ساتھ اجتماعی زیادتی کی۔ دونوں ملزمان آن لائن ٹیکسی سروس چلاتے تھے اور تفتیش کے دوران سروس کمپنی سے ملزمان کا ریکارڈ بھی حاصل کیا گیا۔
عدالت نے فیصلے میں قرار دیا کہ متاثرہ بچی نے شناخت پریڈ کے دوران دونوں ملزمان کو شناخت کیا، جبکہ اس کی گواہی مقدمے میں بنیادی اہمیت رکھتی ہے۔
عدالت کے مطابق طبی شواہد بھی متاثرہ بچی کے بیان سے مکمل مطابقت رکھتے ہیں، جس کی بنیاد پر ملزمان کو قصوروار قرار دیتے ہوئے سزائیں سنائی گئیں۔