بھارتی گلوکار و یوٹیوبر انکت بالیان کو قتل کردیا گیا

بھارت: ہریانوی گلوکار انکت بالیان جم کے باہر فائرنگ سے قتل

بھارتی ریاست اتر پردیش میں ہریانوی گلوکار اور یوٹیوبر انکت بالیان کو نامعلوم مسلح افراد نے فائرنگ کرکے قتل کردیا۔

بھارتی میڈیا کے مطابق انکت بالیان شاملی ضلع کے کوتوالی تھانہ کے علاقے میں واقع جم سے باہر نکل رہے تھے کہ 2 موٹر سائیکلوں پر سوار حملہ آوروں نے ان پر متعدد گولیاں چلائیں، جس کے نتیجے میں وہ موقع پر ہی ہلاک ہوگئے۔

پولیس نے لاش پوسٹ مارٹم کے لیے اسپتال منتقل کردی، جبکہ حملہ آوروں کی شناخت کے لیے علاقے کی سی سی ٹی وی فوٹیجز کا جائزہ لیا جارہا ہے۔

اتر پردیش کے سابق وزیر اعلیٰ نے واقعے کو جاٹ برادری پر حملہ قرار دیا ہے۔

بھارتی میڈیا کے مطابق یہ قیاس آرائیاں بھی سامنے آئی ہیں کہ انکت بالیان آئندہ پنچایت انتخابات میں حصہ لینے کا ارادہ رکھتے تھے، تاہم ان کے قریبی عزیزوں یا پولیس حکام نے اس کی تصدیق نہیں کی۔

رپورٹ کے مطابق انکت بالیان کے یوٹیوب چینل پر 3 لاکھ 66 ہزار سے زائد سبسکرائبرز تھے۔