کراچی کے علاقے ڈیفنس فیز 6 میں فلیٹ سے مردہ پائی گئی پاکستانی اداکارہ حمیرا اصغر کے کیس میں اہم پیش رفت سامنے آئی ہے۔ پولیس نے ان کے موبائل فون کا فارنزک مکمل کرلیا ہے، جس سے معلوم ہوا ہے کہ اداکارہ کا آخری رابطہ اکتوبر 2024 میں ایک آن لائن ٹیکسی ڈرائیور سے ہوا تھا۔
ڈی آئی جی ساؤتھ اسد رضا کے مطابق کال ڈیٹیل ریکارڈ (سی ڈی آر) سے پتا چلا ہے کہ اداکارہ کی جانب سے آخری میسجنگ اور فون استعمال اکتوبر 2024 میں کی گئی، اس کے بعد ان کے فون پر کوئی سرگرمی ریکارڈ نہیں ہوئی۔ سوشل میڈیا پر بھی وہ کئی مہینوں سے غیر فعال تھیں، جہاں فیس بک پر آخری پوسٹ 11 ستمبر 2024 اور انسٹاگرام پر آخری پوسٹ 30 ستمبر 2024 کو کی گئی تھی۔ اداکارہ نے ماضی میں ریئلٹی شو ’تماشا گھر‘ میں بھی شرکت کی تھی۔ ان کا تعلق لاہور سے تھا تاہم کئی سالوں سے وہ کراچی میں تنہا رہائش پذیر تھیں۔ پولیس کے مطابق اداکارہ 2018 سے مذکورہ فلیٹ میں رہائش پذیر تھیں، لیکن 2024 سے کرایہ ادا نہیں کر رہی تھیں۔ فلیٹ کے مالک نے کرایہ نہ ملنے پر عدالت سے رجوع کیا تھا۔
یاد رہے کہ حمیرا اصغر کی لاش 8 جولائی کو اس وقت ملی جب کرائے کی عدم ادائیگی پر عدالتی بیلف مالک مکان کے ہمراہ فلیٹ پر پہنچا۔ دروازہ نہ کھلنے پر جب پولیس نے دروازہ توڑا تو اندر سے شدید سڑنے کے آثار والی لاش برآمد ہوئی۔ پوسٹ مارٹم رپورٹ کے مطابق لاش مکمل طور پر ڈی کمپوز ہو چکی تھی، جس سے اندازہ لگایا جا رہا ہے کہ موت کو کم از کم ایک ماہ گزر چکا ہے۔ پولیس نے اداکارہ کے موبائل ڈیٹا، سوشل میڈیا سرگرمیوں اور ماضی کے تعلقات کی جانچ کا دائرہ مزید وسیع کر دیا ہے تاکہ موت کی اصل وجوہات سامنے لائی جا سکیں۔ واقعے کو متعدد زاویوں سے دیکھا جا رہا ہے، جبکہ حمیرا اصغر کی لاش اب سرد خانے میں موجود ہے اور قانونی کارروائی مکمل ہونے کے بعد لواحقین کے حوالے کی جائے گی۔
