مچھیرے کے چہرے سے آکٹوپس چمٹ گیا، پھر کیا ہوا؟

فلپائن میں آکٹوپس مچھیرے کے چہرے سے چمٹ گیا، حیران کن ویڈیو وائرل

منیلا: فلپائن میں ایک مچھیرے کے چہرے سے آکٹوپس کے چمٹ جانے کی حیران کن ویڈیو سوشل میڈیا پر تیزی سے وائرل ہورہی ہے۔

وائرل ویڈیو میں دیکھا جاسکتا ہے کہ آکٹوپس نے اپنے متعدد بازو مچھیرے کے چہرے کے گرد مضبوطی سے لپیٹ رکھے ہیں، جبکہ مچھیرا اسے خود سے الگ کرنے کی مسلسل کوشش کررہا ہے۔

مچھیرے نے کئی مرتبہ آکٹوپس کو چہرے سے ہٹانے کی کوشش کی، تاہم اس کے سکشن کپ مضبوطی سے چپکے ہوئے تھے، جس کے باعث اسے کافی جدوجہد کرنا پڑی۔

کئی کوششوں کے بعد مچھیرے نے آہستہ آہستہ آکٹوپس کی گرفت ڈھیلی کی اور بالآخر اسے چہرے سے الگ کرنے میں کامیاب ہوگیا۔ بعد ازاں اس نے آکٹوپس کو دوبارہ پانی میں چھوڑ دیا۔

ماہرین کے مطابق آکٹوپس کے آٹھ بازوؤں پر سیکڑوں سکشن کپ موجود ہوتے ہیں، جو اسے مختلف سطحوں اور اشیا کو مضبوطی سے پکڑنے میں مدد دیتے ہیں۔

ماہرین کا کہنا ہے کہ مذکورہ واقعے میں آکٹوپس کا رویہ ممکنہ طور پر دفاعی ردعمل تھا اور غیر معمولی صورتحال میں اس نے اپنی گرفت برقرار رکھنے کی کوشش کی۔