بانی پی ٹی آئی کو مذاکرات کا آغاز کرنا چاہیے: خواجہ آصف
اسلام آباد:وفاقی وزیر دفاع خواجہ آصف نے تحریک انصاف کے ساتھ مذاکرات کو "مذاق رات” قرار دیتے ہوئے کہا کہ اب تک حکومت کو پی ٹی آئی کی طرف سے کوئی باضابطہ پیغام موصول نہیں ہوا ہے۔
قومی اسمبلی کے باہر میڈیا سے گفتگو کرتے ہوئے خواجہ آصف نے بتایا کہ انہوں نے چند منٹ قبل ان وزراء سے پوچھا جو مذاکراتی عمل میں شامل ہیں۔ وزراء نے واضح کیا کہ پی ٹی آئی کی جانب سے کسی قسم کا رابطہ نہیں کیا گیا۔
خواجہ آصف نے کہا کہ اگر پی ٹی آئی مذاکرات چاہتی ہے تو اسے پہلے حکومت سے رابطہ کرنا ہوگا۔ انہوں نے مزید کہا کہ اسپیکر کے ذریعے مذاکرات کا آغاز ہونا چاہیے۔ جب وہ پہل کریں گے، تب ہی حکومت ان سے بات چیت کے لیے جواب دینے کی پوزیشن میں ہوگی۔
وزیر دفاع نے کہا کہ ہمیں یہ دیکھنا ہوگا کہ 26 نومبر سے پہلے پی ٹی آئی کس زبان میں بات کر رہی تھی۔ اب بھی ان کے رویے اور لہجے میں خاص تبدیلی نظر نہیں آ رہی ہے۔
خواجہ آصف نے زور دیا کہ اگر پی ٹی آئی سنجیدگی سے مذاکرات چاہتی ہے تو انہیں اپنا لہجہ نرم کرنا ہوگا اور بات چیت کے لیے مناسب رویہ اختیار کرنا ہوگا۔ انہوں نے مزید کہا کہ حکومت سے مذاکرات کا آغاز صرف بانی پی ٹی آئی کو خود کرنا چاہیے کیونکہ تحریک انصاف میں ان کے علاوہ کسی اور کی حیثیت نہیں ہے۔
