بیلسٹک میزائل، پاکستان کے چار ادارے امریکی پابندیوں کی زد میں

بیلسٹک میزائل، پاکستان کے چار ادارے امریکی پابندیوں کی زد میں

اسلام آباد:امریکا نے پاکستان کے بیلسٹک میزائل پروگرام سے جڑے چار اداروں پر نئی پابندیاں عائد کر دی ہیں۔ یہ پابندیاں طویل فاصلے تک مار کرنے والے میزائلوں کی تیاری اور ترسیل کے خلاف لگائی گئی ہیں تاکہ بڑے پیمانے پر تباہی پھیلانے والے ہتھیاروں کے پھیلاؤ کو روکا جا سکے۔

امریکی محکمہ خارجہ کے مطابق، ان اداروں میں نیشنل ڈیولپمنٹ کمپلیکس شامل ہے جو پاکستان کے بیلسٹک میزائل پروگرام کا اہم حصہ ہے۔ دیگر تین ادارے ایفیلیٹس انٹرنیشنل، اختر اینڈ سنز پرائیویٹ لمیٹڈ، اور راک سائیڈ انٹرپرائزز ہیں۔ ان پر الزام ہے کہ انہوں نے میزائل اور ان سے جڑے آلات پاکستان کو فراہم کیے۔

یہ پابندیاں امریکی ایگزیکٹو آرڈر 13382 کے تحت لگائی گئی ہیں، جس کا مقصد ان تمام سرگرمیوں کو روکنا ہے جو بڑے پیمانے پر تباہی پھیلانے والے ہتھیاروں کی تیاری اور ترسیل میں مددگار ہوں۔

امریکا پہلے بھی پاکستان کے میزائل پروگرام میں شامل کمپنیوں اور چینی اداروں پر پابندیاں لگا چکا ہے۔ ستمبر 2023 میں پاکستان اور چین کی کچھ کمپنیوں کو نشانہ بنایا گیا، اور اکتوبر 2023 میں چینی فرموں پر مزید پابندیاں لگائی گئیں جو میزائل کی تیاری میں استعمال ہونے والا مواد فراہم کر رہی تھیں۔

امریکی حکومت نے واضح کیا ہے کہ وہ ایسے تمام اقدامات کے خلاف سخت کارروائی جاری رکھے گی جو طویل فاصلے تک مار کرنے والے میزائلوں کی تیاری اور ترسیل میں معاون ثابت ہوں۔