پر تشدد سیاست ناکام، نئی سازش شروع: عطاء تارڑ

پر تشدد سیاست ناکام، نئی سازش شروع: عطاء تارڑ

اسلام آباد:وفاقی وزیر اطلاعات عطاء اللہ تارڑ نے کہا ہے کہ عمران خان سول نافرمانی کی ضد پوری کر لیں، لیکن انہیں این آر او کسی بھی صورت نہیں دیا جائے گا۔

سماجی رابطے کی ویب سائٹ "ایکس” پر اپنے بیان میں عطاء تارڑ نے کہا کہ عمران خان اپنی پرتشدد کارروائیوں میں ناکام ہونے کے بعد اب ایک اور ملک دشمن حکمت عملی پر عمل کرنے کی کوشش کر رہے ہیں۔

یہ بیان عمران خان کے حالیہ الٹی میٹم کے جواب میں سامنے آیا ہے، جس میں انہوں نے حکومت سے اپنے مطالبات پورے کرنے کے لیے اتوار تک کی مہلت مانگی تھی اور کہا تھا کہ اس کے بعد وہ سول نافرمانی کی تحریک کا اعلان کریں گے۔

اڈیالہ جیل میں عمران خان سے ملاقات کے بعد ان کی بہن علیمہ خان نے بتایا کہ عمران خان نے 9 مئی اور 26 نومبر کے واقعات کی جوڈیشل انکوائری اور بے گناہ کارکنان کی رہائی کے مطالبات دہرائے ہیں۔