2024ء تلخ و شیریں یادروں کیساتھ رخصت، 2025ء کا شاندر استقبال

لاہور، کراچی:پاکستان نے 2024 کو تلخ و شیریں یادوں کے ساتھ رخصت کرتے ہوئے 2025 کا شاندار استقبال کیا، جہاں امیدیں اور عزم نئی منزلوں کی طرف بڑھنے کے عکاس ہیں۔
رات 12 بجتے ہی ملک بھر کے مختلف شہروں میں رنگا رنگ آتشبازی نے آسمان کو جگمگا دیا، جبکہ شہریوں نے موسیقی اور خوشی کے مختلف پروگراموں کے ساتھ نئے سال کی آمد کا جشن منایا۔
گورنر ہاؤس کراچی میں عالمی ریکارڈ کی کوشش کے تحت 40 منٹ طویل آتشبازی کی گئی جس نے ہزاروں افراد کو متوجہ کیا۔ کامران ٹیسوری کا دعویٰ ہے کہ اس شاندار منظر نے عالمی معیار کا نیا سنگ میل قائم کیا۔
ملک کے تمام بڑے شہروں میں ہوائی فائرنگ پر سخت پابندی عائد کرتے ہوئے سیکیورٹی کو ہائی الرٹ رکھا گیا، اور عوام کو قانون کی خلاف ورزی پر کارروائی سے خبردار کیا گیا۔
صدر مملکت آصف علی زرداری نے نئے سال پر قوم اور عالمی برادری کو مبارکباد دیتے ہوئے ملک کی ترقی و خوشحالی کے لیے دعا کی اور یکجہتی اور محنت سے کام کرنے پر زور دیا۔
انہوں نے اس بات پر روشنی ڈالی کہ ماضی کی کامیابیوں اور ناکامیوں سے سیکھنا ضروری ہے اور پاکستان کے نوجوانوں کو مواقع فراہم کرتے ہوئے غریب طبقے کی خوشحالی کے لیے سرمایہ کاری بڑھانا ہوگی۔
صدر مملکت نے اُمید ظاہر کی کہ 2025 پاکستان کے لیے امن، ترقی، استحکام، اور خوشحالی کا سال ثابت ہوگا اور عوامی خدمت کے لیے نئے سال کا آغاز یکجہتی اور عزم کے ساتھ کریں۔