جعفر ایکسپریس پر دہشت گردوں نے کیسے حملہ کیا: ڈرائیور نے آنکھوں دیکھا حال بیان کردیا

جعفر ایکسپریس پر دہشت گردوں کے حملے کی تفصیلات سامنے آ گئی ہیں، جہاں ٹرین کے ڈرائیور نے آنکھوں دیکھا حال بیان کیا اور پاک فوج کی بروقت کارروائی پر ان کا شکریہ ادا کیا۔ ٹرین کے ڈرائیور کے مطابق، جیسے ہی انجن کے نیچے دھماکہ ہوا، انہوں نے فوراً ایمرجنسی بریک لگا دی۔ گاڑی کے رکتے ہی دہشت گرد پہاڑوں سے نیچے اُتر آئے۔

ڈرائیور کا کہنا تھا کہ گاڑی کے رکنے کی دیر تھی کہ پہاڑوں سے دہشت گرد نیچے اتر آئے اور فوراً راکٹ لانچر اور جدید اسلحے سے حملہ کر دیا۔ فائرنگ اور دھماکوں سے شدید خوف و ہراس پھیل گیا لیکن فورسز نے فوری کارروائی کر کے دہشت گردوں کو گھیرے میں لے لیا۔

ٹرین میں سوار کئی مسافروں نے اس حملے کے خوفناک لمحات کو یاد کرتے ہوئے کہا کہ "ایسا لگا جیسے موت ہمارے بہت قریب آ گئی ہو، لیکن پاک فوج اور ایف سی نے ہمیں بچا لیا۔” مسافروں کے مطابق "دہشت گردوں کے حملے کے بعد فورسز نے بھرپور جوابی کارروائی کی، جس کے نتیجے میں تمام دہشت گرد مارے گئے۔” "ہم پاک فوج اور ایف سی کے شکر گزار ہیں کہ انہوں نے اپنی جان خطرے میں ڈال کر ہمیں بچایا۔”

پاک فوج اور ایف سی کی مشترکہ کارروائی میں تمام دہشت گرد ہلاک کر دیے گئے۔ 190 یرغمال مسافروں کو بحفاظت بازیاب کرا لیا گیا۔ خودکش بمباروں نے عورتوں اور بچوں کو انسانی ڈھال بنایا ہوا تھا، لیکن فورسز نے احتیاط اور مہارت کا مظاہرہ کرتے ہوئے جانیں بچائیں۔