190 ملین پاؤنڈز کیس میں عمران خان کو 14، بشریٰ بی بی کو 7 سال قید کی سزاسنا دی گئی

راولپنڈی:احتساب عدالت نے 190 ملین پاؤنڈز کیس کا فیصلہ سناتے ہوئے تحریک انصاف کے بانی عمران خان کو 14 سال قید اور ان کی اہلیہ بشریٰ بی بی کو 7 سال قید کی سزا سنا دی۔
اڈیالہ جیل میں احتساب عدالت کے جج ناصر جاوید رانا نے کیس کا محفوظ شدہ فیصلہ سنایا۔ عدالت نے القادر ٹرسٹ اور یونیورسٹی کو سرکاری کنٹرول میں دینے کا حکم بھی جاری کیا۔ اس فیصلے کے بعد بشریٰ بی بی کو کمرہ عدالت سے گرفتار کر لیا گیا۔
عدالتی فیصلے کے تحت، عمران خان پر 10 لاکھ روپے جرمانہ عائد کیا گیا ہے۔ اگر جرمانہ ادا نہ کیا تو انہیں 6 ماہ مزید قید کاٹنا ہوگی۔
نیب پراسیکیوشن ٹیم کے ارکان عرفان احمد، سہیل عارف، اور اویس ارشد سماعت کے دوران موجود تھے۔ بشریٰ بی بی کی بیٹی، داماد، اور عمران خان کی بہن علیمہ خان بھی عدالت میں پیش ہوئیں۔
اس اہم کیس کی سماعت کے موقع پر جیل کے باہر سخت سکیورٹی انتظامات کیے گئے تھے۔ ایلیٹ فورس کے کمانڈوز تعینات تھے، اور غیر متعلقہ گاڑیوں کو جیل کے اطراف سے ہٹا دیا گیا تھا۔