فاسٹ ٹریک پاسپورٹ کا دائرہ مزید 26 شہروں تک بڑھا دیا گیا

اسلام آباد:پاسپورٹ کے اجرا کے لیے فاسٹ ٹریک کیٹیگری کی سہولت کا دائرہ 26 مزید شہروں تک بڑھا دیا گیا ہے۔
ڈائریکٹوریٹ آف امیگریشن اینڈ پاسپورٹس کی جانب سے جاری کیے گئے نوٹیفکیشن کے مطابق، اب پاکستان کے 47 شہروں میں فاسٹ ٹریک کیٹیگری کے تحت پاسپورٹ بنوانے کی سہولت دستیاب ہو گی۔
نوٹیفکیشن کے مطابق اسلام آباد، کراچی، لاہور، پشاور، اور کوئٹہ میں یہ سہولت پہلے سے موجود ہے، جب کہ اب اس کا دائرہ اٹک، چکوال، سرگودھا، حافظ آباد، میانوالی، اور بھکر تک بڑھا دیا گیا ہے۔
اعلامیے کے مطابق، یہ سہولت کوہاٹ، صوابی، سوات، ڈیرہ اسماعیل خان، بنوں، ہنگو، ایبٹ آباد، اور ہری پور میں بھی فراہم کی جائے گی۔
مزید برآں، آزاد کشمیر کے مظفرآباد، میرپور، باغ، کوٹلی، اور راولا کوٹ بھی اب فاسٹ ٹریک کیٹیگری میں شامل کر لیے گئے ہیں۔