سعودیہ، ترکیے اور پاکستان کا دفاعی معاہدہ ایران کیلئے خطرہ نہیں: اسماعیل بقائی

سعودی عرب، ترکیہ اور پاکستان کا دفاعی معاہدہ ایران کیلئے خطرہ نہیں: ایرانی وزارت خارجہ

تہران: ایرانی وزارت خارجہ کے ترجمان اسماعیل بقائی نے کہا ہے کہ سعودی عرب، ترکیہ اور پاکستان کے درمیان دفاعی معاہدہ ایران کے لیے خطرہ نہیں ہے۔

میڈیا بریفنگ کے دوران اسماعیل بقائی نے مشرق وسطیٰ میں عدم تحفظ کا ذمہ دار امریکا کو قرار دیتے ہوئے کہا کہ خلیجی ممالک کو ایران کے خلاف حملوں کے لیے امریکا کو اپنی سرزمین استعمال کرنے کی اجازت نہیں دینی چاہیے۔

انہوں نے کہا کہ کسی تیسرے فریق کی مداخلت نہ ہو تو آبنائے ہرمز کھولی جا سکتی ہے۔ ان کا کہنا تھا کہ عمان کے ساتھ ہونے والا معاہدہ آبنائے ہرمز میں جہاز رانی کے تحفظ کی ضمانت نہیں دیتا اور اس معاہدے میں امریکا شامل نہیں ہے۔

ایرانی ترجمان کے مطابق امریکا کے ساتھ فی الحال براہِ راست مذاکرات نہیں ہو رہے، تاہم ثالثوں کے ذریعے پیغامات کا تبادلہ جاری ہے۔ انہوں نے واضح کیا کہ عبوری معاہدے کی خلاف ورزیاں جاری رہنے تک امریکا کے ساتھ بات چیت نہیں ہوگی۔

اسماعیل بقائی نے ایک بار پھر واضح کیا کہ سعودی عرب، ترکیہ اور پاکستان کے درمیان دفاعی معاہدہ ایران کے لیے خطرہ نہیں ہے۔