حکومت سے مذاکرات ناکام، آل پاکستان گڈز ٹرانسپورٹ کی ہڑتال چوتھے روز بھی جاری

گڈز ٹرانسپورٹرز کی ہڑتال چوتھے روز بھی جاری، اشیائے خورونوش مہنگی ہونے کا خدشہ

کراچی: آل پاکستان گڈز ٹرانسپورٹ اتحاد کی ملک گیر ہڑتال چوتھے روز بھی جاری ہے، جس کے باعث اشیائے خورونوش کی قیمتوں میں اضافے کا خدشہ پیدا ہوگیا ہے۔

صدر گڈز ٹرانسپورٹ اتحاد ملک شہزاد اعوان نے کہا ہے کہ حکومت کے ساتھ مذاکرات کامیاب نہیں ہوسکے، جس کے باعث ہڑتال جاری رکھنے کا فیصلہ کیا گیا ہے۔

ملک شہزاد اعوان کا کہنا ہے کہ حکومت ڈیڈ لاک ختم کرنے کے لیے سنجیدہ اقدامات کرے۔ ان کے مطابق مذاکرات کے دروازے بند نہیں کیے گئے، تاہم مطالبات پر واضح پیشرفت ضروری ہے۔

واضح رہے کہ آل پاکستان گڈز ٹرانسپورٹ اتحاد کی جانب سے پیٹرولیم مصنوعات کی قیمتوں میں اضافے اور قیمتوں میں روزانہ ردوبدل کے خلاف احتجاج کیا جارہا ہے۔

ٹرانسپورٹرز کی ہڑتال کے باعث ملک بھر میں اشیائے خورونوش اور دیگر ضروری سامان کی ترسیل متاثر ہونے کا خدشہ ہے، جس سے آنے والے دنوں میں قیمتوں پر بھی دباؤ بڑھ سکتا ہے۔