ویڈیو: میلان ائیر پورٹ پر گاڑی طیارے سے ٹکرا گئی

ویڈیو: میلان ایئرپورٹ پر گاڑی نجی طیارے سے ٹکرا گئی، فضائی آپریشن متاثر

میلان: اٹلی کے شہر میلان کے لیناتے ایئرپورٹ پر گراؤنڈ سروس میں استعمال ہونے والی فیاٹ پانڈا گاڑی بے قابو ہوکر نجی طیارے سے جا ٹکرائی، جس کے باعث ایئرپورٹ پر فضائی آپریشن کچھ دیر کے لیے متاثر رہا۔

ابتدائی اطلاعات کے مطابق حادثہ پیر کی صبح 11 بج کر 20 منٹ پر پیش آیا، جب فیاٹ پانڈا گاڑی بے قابو ہوکر ہاکر بیچ کرافٹ 400 اے نجی طیارے کے اگلے حصے سے ٹکرا گئی۔

تصادم کے نتیجے میں طیارے کے ریڈار ڈوم اور ناک والے حصے کو نقصان پہنچا۔ حادثے کے فوراً بعد امدادی اہلکار موقع پر پہنچے اور طیارے سمیت گاڑی کا معائنہ کیا۔

حکام کے مطابق حادثے میں کسی شخص کے زخمی ہونے کی اطلاع نہیں ملی۔ تاہم واقعے کے باعث لیناتے ایئرپورٹ پر فضائی آپریشن تقریباً 30 منٹ کے لیے روک دیا گیا۔

ایئرپورٹ پر بیک وقت متعدد پروازوں کی آمد و روانگی کے باعث زیادہ تر پروازوں کو متبادل ایئرپورٹس کی جانب موڑنا پڑا۔

تاحال یہ واضح نہیں ہوسکا کہ گراؤنڈ سروس گاڑی کا ڈرائیور گاڑی پر قابو کیوں نہ رکھ سکا۔ ابتدائی طور پر ڈرائیور کی ممکنہ توجہ بھٹکنے یا طبی مسئلے کا امکان ظاہر کیا گیا ہے، تاہم حکام نے ان میں سے کسی وجہ کی تصدیق نہیں کی۔