راولپنڈی: ایم ٹو موٹروے پر متعدد گاڑیاں آپس میں ٹکرا گئیں، ایک شخص جاں بحق، 36 زخمی

ایم ٹو موٹروے پر شدید بارش کے باعث متعدد گاڑیاں ٹکرا گئیں، ایک شخص جاں بحق، 36 زخمی

راولپنڈی: ایم ٹو موٹروے پر کیپیٹل اسمارٹ سٹی کے قریب شدید بارش کے باعث بس سمیت متعدد گاڑیاں آپس میں ٹکرا گئیں، حادثے کے نتیجے میں ایک شخص جاں بحق جبکہ 36 افراد زخمی ہوگئے۔

ریسکیو 1122 کے مطابق جاں بحق شخص کی شناخت شمس الرحمان ولد محمد سلیمان کے نام سے ہوئی ہے، جو اٹک کا رہائشی تھا۔

حکام کے مطابق حادثے میں زخمی ہونے والے 36 افراد میں سے 27 کو پمز اسپتال جبکہ 3 زخمیوں کو شفا انٹرنیشنل اسپتال منتقل کیا گیا، جبکہ بعض زخمیوں کو موقع پر ہی طبی امداد فراہم کی گئی۔

حادثے کی اطلاع ملتے ہی موٹروے پولیس اور ریسکیو ٹیمیں موقع پر پہنچ گئیں اور امدادی کارروائیاں شروع کردیں۔

حکام کے مطابق شدید بارش اور سڑک پر پھسلن حادثے کی ممکنہ وجہ ہوسکتی ہے، واقعے کی مزید تفتیش جاری ہے۔ موٹروے پولیس نے شہریوں کو بارش کے دوران محتاط ڈرائیونگ کرنے کی ہدایت کی ہے۔