ایران اور عمان آبنائے ہرمز میں عارضی بحری راہداری قائم کرنے پرمتفق ہوگئے

ایران اور عمان کا آبنائے ہرمز میں عارضی بحری راہداری قائم کرنے پر اتفاق

تہران میں ایران اور عمان نے آبنائے ہرمز میں عارضی بحری راہداری قائم کرنے پر اتفاق کیا ہے۔

ایرانی وزیر خارجہ عباس عراقچی اور عمان کے وزیر خارجہ سید بدر بن حمد بن حمود البوسعیدی کے درمیان ملاقات میں آبنائے ہرمز میں عارضی میری ٹائم کوریڈور کے قیام اور سمندری راستے کو بارودی سرنگوں سے پاک کرنے کے لیے مشترکہ منصوبے پر بات چیت کی گئی۔

دونوں وزرائے خارجہ نے اس بات پر زور دیا کہ کسی بھی انتظام میں دونوں ممالک کی خودمختاری کا مکمل احترام یقینی بنایا جانا چاہیے۔

ملاقات کے دوران ایک مجوزہ فریم ورک پر بھی تبادلۂ خیال کیا گیا، جس میں آبنائے ہرمز کے ذریعے عارضی مشترکہ بحری راہداری کا قیام اور بارودی سرنگوں کی مشترکہ صفائی کے منصوبے پر عمل درآمد شامل ہے۔

ایرانی وزیر خارجہ عباس عراقچی نے کہا کہ پاکستانی اور عمانی مہمانوں کے ساتھ ملاقاتوں میں علاقائی حل پر زور دیا گیا، جبکہ مستقبل میں آبنائے ہرمز کے انتظامی امور پر بھی گفتگو ہوئی۔

انہوں نے کہا کہ ایران امن اور استحکام کے لیے اپنے عزم پر قائم ہے اور ہمسایہ ممالک کے ساتھ مستقل اور ثابت قدم سفارت کاری اسی عزم کا حصہ ہے۔ ان کے مطابق نئی بحری راہداری، مشترکہ بارودی سرنگوں کی صفائی اور آبنائے ہرمز کے مستقبل کے انتظام سے متعلق تجاویز اس پالیسی کی واضح مثال ہیں۔