اسٹیٹ بینک کا 10 روپے کا کرنسی نوٹ ختم کرنے پر غور
اسلام آباد: ڈپٹی گورنر اسٹیٹ بینک ڈاکٹر عنایت حسین نے کہا ہے کہ اسٹیٹ بینک 10 روپے کا کرنسی نوٹ ختم کرنے پر غور کر رہا ہے۔
سینیٹ کی قائمہ کمیٹی برائے خزانہ کے اجلاس میں نئے کرنسی نوٹوں سے متعلق بریفنگ دیتے ہوئے ڈپٹی گورنر اسٹیٹ بینک نے بتایا کہ 10 روپے کا نوٹ ختم کرنے کی کوشش اس سے قبل بھی دو مرتبہ کی جا چکی ہے۔
ڈاکٹر عنایت حسین کے مطابق 10 روپے کے کرنسی نوٹ کی طباعت کی لاگت بڑھ گئی ہے، جس کی بنیاد پر اسے ختم کرنے پر غور کیا جا رہا ہے۔ انہوں نے کہا کہ جب نئے کرنسی نوٹ جاری کیے جائیں گے تو 10 روپے کا نوٹ ختم کردیا جائے گا۔
اجلاس میں چیئرمین قائمہ کمیٹی سینیٹر سلیم مانڈوی والا نے کہا کہ کمیٹی نے تمام کرنسی نوٹ تبدیل کرنے کی ہدایت کی تھی۔
اسٹیٹ بینک حکام نے بتایا کہ موجودہ ڈیزائن کے کرنسی نوٹ 2005 سے چھپ رہے ہیں، جبکہ نئے سکیورٹی فیچرز کے ساتھ کرنسی نوٹ متعارف کرانے کی تیاری کی جا رہی ہے۔ معاملہ کابینہ میں دو مرتبہ زیرِ بحث آچکا ہے اور کابینہ کی جانب سے تشکیل دی گئی کمیٹی نے نوٹوں کے ڈیزائن میں بعض تبدیلیاں کی ہیں۔
اجلاس میں سینیٹر سلیم مانڈوی والا نے سوال اٹھایا کہ جس کنسلٹنٹ کی خدمات حاصل کی گئی تھیں، اسی کی کمپنی کو کرنسی نوٹ ڈیزائن کرنے کا معاہدہ کیوں دیا گیا اور اس کے لیے بڈنگ کا عمل کیوں نہیں کیا گیا۔
اسٹیٹ بینک کے ایگزیکٹو ڈائریکٹر نے بتایا کہ کنسلٹنٹ کی کمپنی ہی ڈیزائن سمیت متعلقہ کام انجام دے گی۔ اس پر چیئرمین کمیٹی نے کہا کہ اسٹیٹ بینک خودمختار ادارہ ہے، تاہم اسے قواعد و ضوابط کی پابندی کرنا ضروری ہے۔
بریفنگ کے دوران ڈپٹی گورنر اسٹیٹ بینک نے کہا کہ پاکستان میں جعلی کرنسی کی گردش کم ہے، جس پر چیئرمین کمیٹی نے جعلی کرنسی سے متعلق اعداد و شمار پیش کرنے کا مطالبہ کیا۔
نئے کرنسی نوٹوں کے ڈیزائن سے متعلق ڈپٹی گورنر نے بتایا کہ عوام کی پسندیدگی کو بھی مدنظر رکھا جا رہا ہے، تاہم سینیٹرز نے اس پر سوال اٹھاتے ہوئے کہا کہ کرنسی نوٹوں کے معاملے میں پسند یا ناپسند کو بنیادی معیار نہیں ہونا چاہیے۔
ڈپٹی گورنر کے مطابق کابینہ کی ذیلی کمیٹی نئے کرنسی نوٹوں کا جائزہ لے رہی ہے اور کابینہ نے ان کے ڈیزائن میں بڑی تبدیلیاں کی ہیں۔ ان تبدیلیوں کے حتمی ہونے کے بعد نئے کرنسی نوٹ مارکیٹ میں لائے جاسکیں گے۔ انہوں نے بتایا کہ نئے ڈیزائن ایک سال قبل وزارت خزانہ کو بھیجے جا چکے ہیں۔
پمز اسپتال آتشزدگی: نواز شریف کا ذمہ داروں کے خلاف سخت کارروائی کا مطالبہ اسلام آباد: پمز اسپتال کے گائنی…
پمز گائنی وارڈ میں آتشزدگی: زندہ بچ جانے والی نومولود کی خالہ کا انتظامیہ کے دعوے سے اختلاف اسلام آباد:…
عمران خان سے اہل خانہ کی ملاقاتیں ایس او پیز پر عملدرآمد سے مشروط، ذرائع اسلام آباد: باخبر ذرائع کے…
مہنگائی اور پیٹرولیم لیوی کے خلاف جماعت اسلامی کے مختلف شہروں میں دھرنے جاری جماعت اسلامی کی جانب سے مہنگائی…
اسپین نے امیگریشن اور پناہ گزینوں کے قوانین سخت کرنے کا فیصلہ کرلیا دیگر یورپی ممالک کی طرح اسپین نے…
ملک بھر میں عید میلادالنبی ﷺ مذہبی عقیدت و احترام کے ساتھ منائی جا رہی ہے ملک بھر میں نبی…