فیلڈ مارشل کا دورہ ایران ٹرمپ یا امریکا کے نمائندے کی حیثیت سے نہیں تھا: ترجمان دفتر خارجہ

اسلام آباد: فیلڈ مارشل عاصم منیر کا دورۂ ایران امریکی نمائندے کی حیثیت سے نہیں تھا، دفتر خارجہ

اسلام آباد میں ہفتہ وار بریفنگ کے دوران ترجمان دفتر خارجہ طاہر اندرابی نے کہا ہے کہ فیلڈ مارشل عاصم منیر کا دورۂ ایران صدر ٹرمپ یا امریکا کے نمائندے کی حیثیت سے نہیں تھا۔

ترجمان کے مطابق فیلڈ مارشل عاصم منیر کا دورۂ ایران پاکستان کی جاری سفارتی کوششوں کا حصہ تھا، جس دوران ایرانی حکام سے خطے میں کشیدگی کے خاتمے اور مذاکرات کے ذریعے مسئلے کا حل تلاش کرنے پر بات چیت ہوئی۔

طاہر اندرابی نے کہا کہ پاکستان خطے میں کشیدگی کے خاتمے اور مشرق وسطیٰ کے بحران کے حل کے لیے برادر ممالک کے ساتھ مسلسل رابطوں میں ہے۔ پاکستان کی سفارتی کوششوں کا مقصد خطے میں امن و استحکام کو فروغ دینا اور آبنائے ہرمز کو دوبارہ کھولنے کی راہ ہموار کرنا ہے۔

انہوں نے کہا کہ ایرانی قیادت نے خطے میں امن کے لیے پاکستان کے کردار کو سراہا ہے۔

ترجمان دفتر خارجہ نے بتایا کہ وزیراعظم بشکیک میں شنگھائی تعاون تنظیم (ایس سی او) کانفرنس میں شرکت کریں گے اور اس موقع پر دوطرفہ ملاقاتیں بھی کریں گے۔ پاکستان نے ایس سی او کی ایک سال کے لیے چیئرمین شپ سنبھال لی ہے اور 2027 میں اسلام آباد میں ایس سی او سربراہ اجلاس کی میزبانی کرے گا۔