ایس سی او قومی رابطہ کاروں کا تین روزہ اجلاس اسلام آباد میں اختتام پذیر
اسلام آباد میں شنگھائی تعاون تنظیم (ایس سی او) کے قومی رابطہ کاروں کا تین روزہ اجلاس بدھ کے روز اختتام پذیر ہوگیا۔
اجلاس کے بعد بھارتی قومی رابطہ کار آلوک دیمری نے پاکستانی سرکاری میڈیا سے گفتگو کرتے ہوئے کہا کہ انہیں پہلی مرتبہ پاکستان آنے پر خوشی ہوئی ہے۔
پاکستان نے رواں ماہ شنگھائی تعاون تنظیم کی 2026-27 کے لیے سربراہی سنبھالی ہے، جبکہ اگست 2027 میں ایس سی او کے سربراہانِ مملکت کے اجلاس کی میزبانی بھی اسلام آباد کرے گا۔
28 سے 30 ستمبر تک جاری رہنے والے اجلاس میں پاکستان کی صدارت کے دوران ایس سی او کی سرگرمیوں کے پروگرام، آئندہ اجلاسوں اور اہم تقریبات کی تیاریوں سمیت تنظیم کے ایجنڈے سے متعلق مختلف امور پر غور کیا گیا۔
پاکستان نے اپنی صدارت کے لیے ’تصور کو عمل میں بدلنا: رابطہ کاری، جدت اور مشترکہ خوشحالی‘ کا موضوع منتخب کیا ہے۔ اس کے تحت علاقائی رابطہ کاری، اقتصادی تعاون، جدت اور رکن ممالک کے عوام کے درمیان روابط کے فروغ کو ترجیح دینے کا اعلان کیا گیا ہے۔
اجلاس میں بھارت کی شرکت خاص طور پر قابلِ ذکر رہی، کیونکہ یہ دونوں ممالک کے درمیان موجودہ کشیدہ دوطرفہ تعلقات کے ماحول میں ہوئی ہے۔
اسلام آباد میں منعقد ہونے والا یہ اجلاس اگلے سال ہونے والے ایس سی او سربراہی اجلاس کی تیاری کے عمل کا ابتدائی مرحلہ بھی قرار دیا جا رہا ہے۔
پاکستان نے کہا ہے کہ اگست 2027 میں ہونے والے سربراہی اجلاس میں ایس سی او کے تمام رکن ممالک کے رہنماؤں کو مدعو کیا جائے گا، جن میں بھارتی وزیر اعظم نریندر مودی بھی شامل ہوں گے۔
’امید ہے دیگر شہر دیکھنے کا بھی موقع ملے گا‘
بدھ کے روز پاکستان کی وزارتِ خارجہ نے بھارتی قومی رابطہ کار آلوک دیمری کی پاکستانی سرکاری میڈیا سے ہونے والی گفتگو اپنے ایکس اکاؤنٹ پر شیئر کی۔
گفتگو میں آلوک دیمری نے پاکستان کے اپنے پہلے دورے پر خوشی کا اظہار کرتے ہوئے امید ظاہر کی کہ انہیں مستقبل میں پاکستان کے دیگر شہروں کو دیکھنے کا موقع بھی ملے گا۔
