پاکستان کرکٹ بورڈ نے بابر اعظم کا استعفیٰ منظور کر لیا

پاکستان کرکٹ بورڈ نے بابر اعظم کا استعفیٰ منظور کر لیا

لاہور:پاکستان کرکٹ بورڈ (پی سی بی) نے قومی کرکٹ ٹیم کے وائٹ بال فارمیٹس کے کپتان بابراعظم کا استعفیٰ منظور کرلیا ہے۔ پی سی بی کے جاری کردہ اعلامیے کے مطابق، سلیکشن کمیٹی کو وائٹ بال کرکٹ کے لیے نئی حکمت عملی تیار کرنے کا عمل سونپا گیا ہے، جس میں نئے کپتان کی سفارشات بھی شامل ہوں گی۔

پی سی بی نے واضح کیا کہ وہ بابر اعظم کی قیادت کی حمایت کرتے رہے ہیں، لیکن ان کا مستعفی ہونے کا فیصلہ ان کی ذاتی ترجیحات اور اپنی بیٹنگ پر مکمل توجہ دینے کی خواہش کی نشاندہی کرتا ہے۔ یہ اقدام بابر اعظم کی پیشہ ورانہ سوچ اور پاکستان کرکٹ کے ساتھ گہری وابستگی کا عکاس ہے۔

بورڈ نے بابر اعظم کی خدمات کو سراہتے ہوئے ان کے ٹیم کی ضروریات کو ترجیح دینے اور بے مثال لگن کو تسلیم کیا۔ پی سی بی نے یہ بھی کہا کہ وہ بابر اعظم کی کرکٹ میں بطور ورلڈ کلاس بیٹر اور سینئر کھلاڑی کے طور پر مکمل حمایت جاری رکھے گا کیونکہ ان کی پاکستان کرکٹ کے لیے ابھی بھی بہت زیادہ خدمات باقی ہیں۔

بابراعظم نے استعفے کے بعد کہا کہ پاکستان کے لیے کھیلنا ہمیشہ ان کے لیے ایک بڑا اعزاز رہا ہے اور وہ ہمیشہ ٹیم کی کامیابی کو ذاتی ترجیحات پر فوقیت دیتے رہے ہیں۔ انہوں نے مزید کہا کہ کپتانی چھوڑنے کا فیصلہ انہیں بطور کھلاڑی مزید کارکردگی دکھانے میں مدد دے گا، اور وہ پوری طرح اس مقصد کے لیے پرعزم ہیں کہ ٹیم کی کامیابی کو یقینی بنایا جائے۔

انہوں نے کہا کہ انہیں گزشتہ پانچ سال تک پاکستان کی قیادت کرنے کا اعزاز حاصل رہا ہے اور ہمیشہ کپتان اور کھلاڑی دونوں کے طور پر اپنی بہترین صلاحیتیں پیش کرنے کی کوشش کی ہے۔ اس موقع پر، بابر اعظم نے اس یقین کا اظہار کیا کہ وہ اب اپنی بیٹنگ پر توجہ مرکوز کرکے ٹیم کے لیے بڑا کردار ادا کرسکتے ہیں۔ انہوں نے اپنے ساتھی کھلاڑیوں، کوچز اور پی سی بی کا شکریہ ادا کیا جنہوں نے ان کی کپتانی کے دوران ان کا ساتھ دیا۔

بابر اعظم نے مزید کہا کہ اگرچہ پاکستان کی قیادت کرنا ان کے لیے باعث فخر رہا، لیکن اب وہ وقت ہے کہ وہ اپنی بیٹنگ اور ٹیم کے مقاصد پر اپنی مکمل توجہ مرکوز کریں، ساتھ ہی نئے کپتان اور ابھرتے ہوئے کھلاڑیوں کی حمایت کریں، کیونکہ ٹیم کو آنے والے اہم سیزن کی تیاری کرنی ہے جس میں پاکستان کو اپنی سرزمین پر آئی سی سی چیمپئنز ٹرافی کی میزبانی کرنی ہے۔