قذافی اسٹیڈیم کی تزئینِ نو مکمل، وزیراعظم 7 فروری کو افتتاح کریں گے

لاہور: چیمپئنز ٹرافی 2025 کی تیاریوں کے سلسلے میں جدید طرز پر تعمیر کیے گئے قذافی اسٹیڈیم کا باضابطہ افتتاح 7 فروری کو شام 7 بجے وزیرِاعظم شہباز شریف کریں گے۔افتتاحی تقریب کے دوران لیزر لائٹ شو سمیت مختلف رنگا رنگ تفریحی پرفارمنس کا اہتمام کیا گیا ہے، جس میں کرکٹ اور فنونِ لطیفہ سے وابستہ شخصیات کی شرکت متوقع ہے۔

پاکستان کرکٹ بورڈ (PCB) کے چیئرمین محسن نقوی اسٹیڈیم کی تعمیر میں حصہ لینے والے ایک ہزار مزدوروں کو دوپہر ایک بجے ظہرانہ دیں گے۔ اس موقع پر ان کی خدمات کو سراہنے کے لیے خصوصی تعریفی اسناد بھی دیے جانے کا امکان ہے۔افتتاحی تقریب میں شریک معزز مہمانوں کو "عمران خان انکلوژر” میں بٹھایا جائے گا، جہاں سے وہ اس تاریخی تقریب کا نظارہ کریں گے۔رات 7 بج کر 30 منٹ پر قومی کرکٹ ٹیم کی چیمپئنز ٹرافی 2025 کے لیے نئی کٹ کی باضابطہ رونمائی بھی کی جائے گی، جس میں قومی کھلاڑی اور کوچنگ اسٹاف موجود ہوں گے.