’کھانے کی برائیاں کون کرے گا؟‘، منفرد شادی کارڈ سوشل میڈیا پر چھا گیا

بھارت میں ایک شادی کے کارڈ نے سوشل میڈیا پر ہلچل مچا دی ہے، جس میں مہمانوں کو منفرد انداز میں مدعو کرنے کے ساتھ ساتھ ان کی بے عزتی بھی کی گئی ہے۔ کارڈ کی شروعات کچھ یوں ہوتی ہے، "ہماری شادی میں آپ کی موجودگی بہت ضروری ہے، کیونکہ آپ نہ آئے تو کھانے کی برائی کون کرے گا؟”

یہ کارڈ ایکس (ٹوئٹر) پر وائرل ہوا ہے اور اس کے متن نے ہر کسی کو حیران کر دیا ہے۔ دلہن کے نام کی جگہ ‘شرما جی کی لڑکی’ (پڑھائی میں تیز) اور دلہے کے نام کی جگہ ‘گوپال جی کا لڑکا’ (بی ٹیک کرکے دکان سنبھالتا ہوا) لکھا گیا ہے۔ شادی کی تاریخ 5 جنوری 2025 ہے اور کارڈ میں یہ بھی درج ہے کہ ٹنکو کے ایگزام اسی دن ختم ہو رہے ہیں۔

کارڈ میں ریسیپشن کا دعوت نامہ بھی شامل ہے، جس میں لکھا ہے کہ شادی ہو چکی ہے، اب باری ہے بوا اور پھوپھاجی کے جھگڑے کی۔ کارڈ میں مہمانوں کے لیے گائیڈ لائنز بھی درج ہیں، جیسے کہ "برائے مہربانی اپنے بچوں کو سنبھالیں، شادی کا اسٹیج ان کا کھیل کا میدان نہیں۔”

کارڈ میں مزید لکھا ہے کہ "پھوپھا پھوپھی جی سے مل کر جائیں ورنہ ان کا منہ گول گپے کی طرح پھول جائے گا، کھانا کھا کر جائیں، ایک شخص کے ریٹ صرف 2000 روپے پلیٹ ہیں۔” تحائف کے بارے میں لکھا ہے کہ "براہ مہربانی کوئی تحفہ نہیں، صرف گوگل پے یا نقد، کیونکہ ہمیں پہلے ہی 7 ڈنر سیٹ اور 20 فوٹو فریمز مل چکے ہیں۔”