بلند و بالا عمارت جتنا سیارچہ زمین کی طرف تیزی سے آ رہا ہے: ناسا کی تصدیق
امریکی خلائی ادارے ناسا کے مطابق ایک بڑا سیارچہ، جسے ایسٹرائیڈ 2011 ایم ڈبلیو 1 کہا جاتا ہے، 25 جولائی کو زمین کے قریب سے گزرے گا۔ یہ سیارچہ تقریباً 380 فٹ چوڑا ہے اور 28,946 کلومیٹر فی گھنٹہ کی رفتار سے سفر کر رہا ہے۔ خوش قسمتی سے، ناسا نے یقین دلایا ہے کہ اس سیارچے سے زمین کو کوئی خطرہ لاحق نہیں ہوگا کیونکہ یہ زمین سے تقریباً 24 لاکھ میل دوری سے گزرے گا۔
ناسا نے اس سیارچے کو نیئر ارتھ ایسٹرائیڈز کی فہرست میں شامل کیا ہے، تاہم اسے خطرناک سیارچوں میں شامل نہیں کیا گیا ہے۔ نیئر ارتھ ایسٹرائیڈز کی فہرست میں تقریباً 35 ہزار سیارچے شامل ہیں، جن پر ناسا کی جانب سے مستقل نظر رکھی جاتی ہے تاکہ زمین کو کسی ممکنہ خطرے سے بچایا جا سکے۔
سیارچے نظام شمسی کی تشکیل کے بعد بچ جانے والے مادوں کے ذرات سے بنے ہیں اور عموماً سورج کے گرد چکر لگاتے ہیں۔ ان میں سے زیادہ تر چھوٹے ہوتے ہیں اور مریخ اور مشتری کے درمیان واقع سیارچوں کی پٹی میں موجود ہیں۔ ناسا نے ان سیارچوں کی مانیٹرنگ کے لیے مختلف مشنز بھیجے ہیں تاکہ زمین کو ممکنہ خطرات سے محفوظ رکھا جا سکے۔
حال ہی میں، ناسا نے اپنے تجرباتی ڈارٹ مشن کے تحت ایک سیارچے ڈیمورفس سے ٹکرایا تھا تاکہ اس کے مدار میں معمولی تبدیلی لائی جا سکے۔ ناسا نے اس مشن کو کامیاب قرار دیا تھا۔
