اسرائیلی حملوں میں ایران کےچیف آف آرمی سٹاف شہید ہو گئے

تہران (ایم وائے کے نیوز) ایران کے سرکاری میڈیا نے تصدیق کی ہے کہ اسرائیل کے حالیہ فضائی حملوں میں ایران کے مسلح افواج کے سربراہ میجر جنرل محمد باقری شہید ہو گئے ہیں۔ وہ ایران کی سب سے اعلیٰ فوجی شخصیت تھے اور ملک کے دفاعی نظام میں مرکزی حیثیت رکھتے تھے۔

اس سے قبل بھی ایرانی میڈیا نے اطلاع دی تھی کہ اسرائیلی حملے میں پاسدارانِ انقلاب کے کمانڈر انچیف حسین سلامی، ایرانی جوہری تنظیم کے سابق سربراہ فریدون عباسی اور اسلامی آزاد یونیورسٹی کے صدر محمد مہدی تہرانچی ہلاک ہو چکے ہیں۔

یہ حملے ایران کے نیوکلیئر اور ملٹری مراکز پر کیے گئے، جن سے ملک کو بھاری جانی و عسکری نقصان پہنچا ہے۔ میجر جنرل محمد باقری کی شہادت ایران کے لیے ایک بڑا صدمہ ہے، اور اس واقعے کے بعد ایران اور اسرائیل کے درمیان شدید کشیدگی اور کھلی جنگ کے خدشات میں مزید اضافہ ہو گیا ہے۔ ایرانی قیادت کی جانب سے اسرائیل کو بھرپور جوابی کارروائی کی دھمکیاں دی گئی ہیں، جبکہ عالمی برادری کی نظریں مشرق وسطیٰ کی اس بگڑتی ہوئی صورتحال پر مرکوز ہیں۔