کسان کے خاندان سے کھیت میں چھپائے گئے لاکھوں روپے دیمک کھاگئی

بھارت: کسان نے 5 لاکھ روپے کھیت میں چھپائے، ایک سال بعد رقم دیمک کی نذر ہوگئی

راجستھان: بھارت میں ایک کسان کو خاندان سے رقم محفوظ رکھنے کے لیے 5 لاکھ روپے کھیت میں چھپانا مہنگا پڑگیا، ایک سال بعد جب رقم ملی تو زیادہ تر نوٹ دیمک کھا چکی تھی۔

بھارتی میڈیا کے مطابق راجستھان کے ایک گاؤں میں کسان نے تقریباً ایک سال قبل اپنی زمین کا ایک ٹکڑا 5 لاکھ روپے میں فروخت کیا تھا۔ کسان کو خدشہ تھا کہ اس کے بیٹے رقم خرچ کردیں گے، اس لیے اس نے پیسے گھر میں رکھنے کے بجائے پلاسٹک کے بیگ میں ڈالے اور کھیت میں گڑھا کھود کر چھپا دیے۔

رقم چھپانے کے بعد کسان اسے بھول گیا۔ کچھ ماہ بعد گھر میں تعمیراتی کام کے لیے پیسوں کی ضرورت پڑی تو اس نے کھیت میں رقم تلاش کی، تاہم اسے رقم نہ مل سکی۔

کسان نے جب اہل خانہ کو بتایا کہ اس نے پیسے کھیت میں چھپائے تھے تو انہیں بھی اس کی بات پر یقین نہیں آیا، تاہم خاندان نے مل کر تلاش کی لیکن کوئی کامیابی نہ ہوئی۔

تقریباً ایک سال بعد مون سون کے دوران کسان کو کھیت میں ایک بیگ تیرتا ہوا دکھائی دیا۔ بیگ کھولا گیا تو کسان اور اس کے اہل خانہ کے ہوش اڑ گئے کیونکہ اس میں موجود زیادہ تر رقم دیمک کھا چکی تھی۔

رپورٹس کے مطابق بیگ میں زیادہ تر 500 روپے کے نوٹ تھے جو بری طرح متاثر ہوچکے تھے۔

خاندان رقم لے کر بینک بھی پہنچا، تاہم بینک حکام نے بھی مبینہ طور پر کسی قسم کی مدد کرنے سے انکار کردیا۔