ٹی ٹوئنٹی ورلڈکپ کوالیفائر : سابق آسٹریلوی کرکٹر پرتگال کرکٹ ٹیم کے کپتان مقرر

سابق آسٹریلوی آل راؤنڈر موئسس ہنریکس پرتگال کرکٹ ٹیم کے کپتان مقرر

سابق آسٹریلوی آل راؤنڈر موئسس ہنریکس کو ٹی ٹوئنٹی ورلڈ کپ یورپ سب ریجنل کوالیفائر سی کے لیے پرتگال کرکٹ ٹیم کا کپتان مقرر کردیا گیا۔

39 سالہ ہنریکس 14 رکنی پرتگالی اسکواڈ کی قیادت کریں گے۔ ٹورنامنٹ 14 سے 20 اگست تک فن لینڈ میں کھیلا جائے گا، جس کے گروپ بی میں پرتگال، اسرائیل، جرمنی، یونان اور چیکیا شامل ہیں۔

پرتگال اپنی کوالیفائنگ مہم کا آغاز 14 اگست کو اسرائیل کے خلاف کرے گا، جبکہ گروپ کی فاتح ٹیم 21 اگست کو فائنل کھیلے گی۔ فائنل جیتنے والی ٹیم یورپی ریجنل فائنل کے لیے کوالیفائی کرے گی۔

موئسس ہنریکس نے آسٹریلیا کی جانب سے 4 ٹیسٹ، 16 ون ڈے اور 24 ٹی ٹوئنٹی انٹرنیشنل میچز کھیلے۔ انہوں نے آسٹریلیا کے لیے آخری میچ 2021 میں کھیلا تھا۔ گزشتہ ماہ انہوں نے آسٹریلوی ڈومیسٹک کرکٹ سے ریٹائرمنٹ کا اعلان کیا۔

ہنریکس پرتگالی جزیرے مڈیرا میں پیدا ہوئے تھے، جو عالمی فٹبال اسٹار کرسٹیانو رونالڈو کی جائے پیدائش بھی ہے۔ وہ بچپن میں اپنے خاندان کے ہمراہ آسٹریلیا منتقل ہوگئے، جہاں انہوں نے نیو ساؤتھ ویلز اور سڈنی سکسرز کی نمائندگی کرتے ہوئے کامیاب کرکٹ کیریئر بنایا۔

اس وقت آئی سی سی مینز ٹی ٹوئنٹی رینکنگ میں پرتگال 37ویں نمبر پر ہے۔ ٹیم کی نظریں کوالیفائر میں کامیابی حاصل کرکے اگلے مرحلے تک پہنچنے پر ہیں۔

یورپی ریجنل فائنل کی ٹاپ دو ٹیمیں 2028 ٹی ٹوئنٹی ورلڈ کپ کے عالمی کوالیفائر کے لیے کوالیفائی کریں گی، جس کی میزبانی آسٹریلیا اور نیوزی لینڈ کریں گے۔