مدینہ منورہ کے زائرین کے لیے خوشخبری
مدینہ منورہ میں مسجد نبوی ﷺ کی زیارت کے خواہشمند افراد کے لیے بڑی سہولت فراہم کی گئی ہے۔
حرمین شریفین کی انتظامیہ نے اعلان کیا ہے کہ ریاض الجنہ میں نوافل کی ادائیگی پر ایک سال کی پابندی ختم کر دی گئی ہے۔ اب زائرین پورے سال میں کئی بار نوافل ادا کر سکتے ہیں۔
تاہم، ریاض الجنہ میں داخلے اور نوافل ادا کرنے کے لیے نسک موبائل ایپ کے ذریعے پرمٹ لینا ضروری ہوگا۔
نئے نظام کے مطابق، زائرین ہر 20 منٹ میں نسک ایپ کے ذریعے نیا پرمٹ حاصل کر سکتے ہیں۔ یہ سہولت مسجد نبوی ﷺ میں موجود زائرین کے لیے بھی دستیاب ہے، جو موبائل ایپ کے ذریعے اجازت نامہ لے کر نوافل ادا کر سکیں گے۔
یہ فیصلہ زائرین کو زیادہ سہولت فراہم کرنے کے لیے کیا گیا ہے، جسے بہت پسند کیا جا رہا ہے۔
