جرسی تنازع: پی سی بی کے دباؤ پر بھارتی کرکٹ بورڈ نے مؤقف بدل لیا
بھارتی کرکٹ بورڈ نے چیمپئنز ٹرافی 2025 کے لیے انڈین ٹیم کی جرسی پر میزبان ملک پاکستان کا نام نہ لکھنے کے اپنے فیصلے پر پاکستان کرکٹ بورڈ (پی سی بی) کے اعتراض کے بعد اپنا مؤقف تبدیل کرلیا ہے۔
گزشتہ دنوں میڈیا میں یہ خبر سامنے آئی تھی کہ بھارتی بورڈ نے چیمپئنز ٹرافی کے لیے ٹیم کی جرسی پر "پاکستان” (میزبان ملک) کا نام شامل کرنے پر اعتراض کیا تھا۔ رپورٹس کے مطابق، بھارتی ٹیم اپنے میچز دبئی میں کھیلے گی، اس لیے وہ جرسی پر پاکستان کا ذکر نہیں چاہتی تھی۔
تاہم، آئی سی سی نے بھارتی بورڈ کو واضح کیا کہ ٹیم اپنے میچز کہیں بھی کھیلے، لیکن جرسی پر میزبان ملک کا نام لکھنا ضروری ہے کیونکہ یہ پاکستان کے میزبانی والے ٹورنامنٹ کا اصول ہے۔
چیمپئنز ٹرافی 2025 کے ہائبرڈ ماڈل کے تحت بھارتی ٹیم دبئی میں میچ کھیلے گی، لیکن ایونٹ کے میزبان پاکستان ہے۔ آئی سی سی کے قوانین کے مطابق میزبان ملک کا نام ایونٹ کی جرسی پر چھاپنا لازم ہوتا ہے۔
پاکستان کرکٹ بورڈ کے ایک عہدیدار نے بھارتی بورڈ کے رویے کو "کرکٹ میں سیاست” قرار دیا تھا اور کہا تھا کہ یہ رویہ تنازع پیدا کرنے کی کوشش ہے۔ انہوں نے مزید کہا تھا کہ بھارت نے کیپٹنز میٹ اور افتتاحی تقریب کے دوران اپنے کپتان روہت شرما کو پاکستان بھیجنے سے بھی انکار کیا، تاکہ میزبان ملک کو بدنام کیا جاسکے۔
عہدیدار کے مطابق، بھارتی بورڈ کا یہ اقدام جان بوجھ کر تنازع پیدا کرنے کے لیے کیا گیا، جس کا پی سی بی سخت جواب دے گا۔
اب خبر آئی ہے کہ پی سی بی کے سخت ردعمل کے امکان کے باعث بھارتی بورڈ نے اپنا فیصلہ بدل لیا ہے۔ بھارتی بورڈ کے سیکریٹری نے ایک اہم بیان میں کہا کہ بھارتی ٹیم کی جرسی پر پاکستان کا نام اور لوگو شامل کیا جائے گا اور آئی سی سی کی ہدایات پر عمل ہوگا۔
واضح رہے کہ چیمپئنز ٹرافی کی میزبانی کے معاملے پر پی سی بی اور بی سی سی آئی کے درمیان طویل عرصے سے کشیدگی جاری ہے۔ پہلے بھارت نے پاکستان سے میزبانی واپس لینے کی کوشش کی، لیکن ناکامی پر سیکیورٹی کے بہانے اپنی ٹیم پاکستان بھیجنے سے انکار کردیا۔
آخر کار، ایک معاہدے کے تحت فیصلہ ہوا کہ بھارتی ٹیم اپنے میچز دبئی میں کھیلے گی، اور مستقبل میں پاکستان کی ٹیم بھی آئی سی سی ایونٹس کے لیے بھارت کے بجائے نیوٹرل وینیو پر میچز کھیلے گی۔
