کراچی (ایم وائے کے نیوز ٹی وی): پاکستان شوبز انڈسٹری کی معروف اداکارہ صنم سعید اور اداکار محب مرزا کے ہاں بیٹے کی پیدائش ہوئی ہے، جس کی تصدیق دونوں فنکاروں نے سوشل میڈیا کے ذریعے کر دی۔ مداحوں کے لیے یہ خبر خوشی کا باعث بنی اور سوشل میڈیا پر جوڑے کو مبارکبادوں کا تانتا بندھ گیا۔
اداکارہ صنم سعید نے اتوار کے روز انسٹاگرام پر ایک جذباتی پوسٹ کے ذریعے اعلان کیا کہ ان کے ہاں بیٹے کی ولادت 18 مئی 2025 کو ہوئی ہے۔ انہوں نے اپنے نوزائیدہ بیٹے کا نام ولی حسن مرزا رکھا ہے اور ساتھ ہی مداحوں سے خصوصی دعا کی درخواست بھی کی۔ صنم سعید نے اپنی پوسٹ میں لکھا: "اللہ کے کرم سے ہمارے گھر بیٹے کی آمد ہوئی ہے، ہم نہایت خوش اور شکر گزار ہیں۔ براہ کرم ولی حسن مرزا کو اپنی دعاوں میں یاد رکھیں۔” اس کے ساتھ انہوں نے ایک خوبصورت تصویر بھی شیئر کی، جس میں ایک ننھے ہاتھ کو والدین کے ہاتھوں میں تھامے دکھایا گیا۔
صنم سعید اور محب مرزا کے درمیان رشتہ گزشتہ چند سالوں میں پروان چڑھا اور دونوں کی جوڑی شوبز انڈسٹری میں ایک مستحکم، باوقار اور پُرکشش جوڑے کے طور پر دیکھی جاتی ہے۔ مداحوں کی بڑی تعداد ان کے ذاتی اور پیشہ ورانہ سفر کو دلچسپی سے فالو کرتی ہے۔ اداکارہ کی اس خوشخبری پر شوبز انڈسٹری کی کئی معروف شخصیات اور پرستاروں نے انہیں مبارکباد دی ہے۔ انسٹاگرام اور دیگر پلیٹ فارمز پر دعاؤں اور محبت بھرے پیغامات کا سیلاب آگیا ہے، جہاں لوگوں نے نیک تمناؤں کے ساتھ ولی حسن مرزا کے لیے روشن مستقبل کی دعا کی۔
صنم سعید، جو ڈرامہ سیریل "زندگی گلزار ہے” سے شہرت کی بلندیوں پر پہنچیں، اپنی شاندار اداکاری اور باوقار شخصیت کی بدولت لاکھوں دلوں کی دھڑکن ہیں۔ جبکہ محب مرزا بھی پاکستانی فلم اور ٹی وی انڈسٹری کے ایک نمایاں نام ہیں۔
