ثمرہ فاطمہ: لاہور میں فضائی آلودگی پر قابو پانے کے لیے تعمیراتی منصوبوں میں ڈسٹ کنٹرول کے اقدامات سخت کردیے گئے۔
لاہور میں ایئر کوالٹی انڈیکس (AQI) کی صورتحال بہتر بنانے کے لیے تعمیراتی منصوبوں میں دھول اور مٹی کے پھیلاؤ کو روکنے کے اقدامات مزید سخت کردیے گئے ہیں۔
ماحولیاتی تحفظ ایجنسی (EPA) کی جانب سے ڈسٹ پولوشن کنٹرول کے حوالے سے لاہور ڈویلپمنٹ اتھارٹی (LDA) کو نوٹسز جاری کیے گئے ہیں۔
EPA نے واضح کیا ہے کہ تعمیراتی منصوبوں میں ڈسٹ کنٹرول کے مقررہ ایس او پیز پر ہر صورت عملدرآمد یقینی بنایا جائے۔ ایس او پیز کی خلاف ورزی کرنے والے کنٹریکٹرز پر جرمانے عائد کیے جائیں گے، جبکہ تعمیراتی سائٹس سے دھول اور مٹی کے سڑکوں یا آبادیوں تک پھیلاؤ کی اجازت نہیں دی جائے گی۔
تعمیراتی مقامات پر مسٹ سپرنکلر سسٹم کی تنصیب بھی لازمی قرار دی گئی ہے تاکہ گردوغبار کو کنٹرول کیا جاسکے۔ اس کے علاوہ تعمیراتی سائٹس کے گرد کم از کم 10 فٹ بلند پردہ لگانا ضروری ہوگا، جبکہ مٹی اور ملبہ لے جانے والی گاڑیوں کو کم رفتار سے چلانے کی ہدایت کی گئی ہے۔
ماحولیاتی حکام نے خبردار کیا ہے کہ ڈسٹ کنٹرول کے ضوابط پر عمل نہ کرنے والے منصوبوں اور کنٹریکٹرز کے خلاف کارروائی عمل میں لائی جائے گی۔
