فیصل آباد: واردات کی نیت سے گھر میں داخل ہونے والی دو مسلح خواتین ڈاکو گرفتار

فیصل آباد (ایم وائے کے نیوز) – تھانہ سمن آباد کے علاقے ستارہ کالونی میں واردات کی نیت سے گھر میں داخل ہونے والی دو مسلح خواتین کو اہل خانہ نے رنگے ہاتھوں پکڑ کر پولیس کے حوالے کر دیا۔ پولیس نے ملزمہ رخسانہ بی بی اور مسکان بی بی کے خلاف مقدمہ درج کر کے تفتیش کا آغاز کر دیا ہے۔

تفصیلات کے مطابق دونوں خواتین ڈاکو فاروق نامی شہری کے گھر داخل ہوئیں اور اس کی اہلیہ عائشہ بی بی کو گن پوائنٹ پر یرغمال بنا لیا۔ اس موقع پر گھر کا ایک عزیز اچانک پہنچا، جس نے فوری کارروائی کرتے ہوئے دونوں خواتین کو قابو کر لیا۔ اہل خانہ کے مطابق خاتون ڈاکو کے ہاتھ میں موجود پستول مبینہ طور پر جعلی نکلا۔ گھر والوں نے دونوں خواتین کو قابو کرنے کے بعد انہیں پولیس کے حوالے کر دیا، جب کہ ان کا ایک ساتھی موقع سے فرار ہونے میں کامیاب ہو گیا۔ پولیس کا کہنا ہے کہ واقعے کا مقدمہ درج کر لیا گیا ہے اور ڈکیتی کی کوشش، غیر قانونی اسلحہ اور دیگر دفعات کے تحت قانونی کارروائی کی جا رہی ہے، جب کہ مفرور ملزم کی تلاش بھی جاری ہے۔