کراچی؛ تین بوریوں میں بند لاش کے ٹکڑوں کی لرزہ خیز تفصیلات سامنے آگئیں

کراچی: جھاڑیوں سے ٹکڑوں میں لاش برآمد، قتل کا مقدمہ درج

کراچی کے علاقے ملیر سٹی میں باون شاہ مزار کے قریب جھاڑیوں سے تین بوریوں میں انسانی لاش کے ٹکڑے ملنے کے واقعے کا مقدمہ قتل کی دفعہ کے تحت سرکاری مدعیت میں درج کرلیا گیا۔

پولیس حکام کے مطابق مقتول کی شناخت تاحال نہیں ہوسکی، جبکہ اس کی عمر 27 سے 28 سال کے درمیان معلوم ہوتی ہے۔ واقعے کا مقدمہ ایف آئی آر نمبر 638/26 کے تحت سب انسپکٹر صداقت علی کی مدعیت میں درج کیا گیا ہے۔

مقدمے کے متن کے مطابق باون شاہ روڈ کے قریب جھاڑیوں میں تین بوریاں پڑی ہونے کی اطلاع پر پولیس موقع پر پہنچی اور ایمبولینس و کرائم سین یونٹ کو طلب کیا گیا۔

کرائم سین یونٹ کے معائنے کے دوران بوریوں سے انسانی جسم کے مختلف حصے برآمد ہوئے۔ لاش کو قانونی کارروائی کے بعد جناح اسپتال منتقل کیا گیا، جہاں پوسٹ مارٹم بھی مکمل کرلیا گیا۔

پولیس کے مطابق مقتول کو نامعلوم مقام پر نامعلوم وجوہات یا کسی رنجش کی بنا پر قتل کرکے لاش یہاں پھینکے جانے کا شبہ ہے۔

پولیس نے مقدمہ درج کرنے کے بعد مقتول کی شناخت کی کوششیں شروع کردی ہیں، جبکہ واقعے کی مزید تفتیش بھی جاری ہے۔