دانتوں کا علاج یادداشت کو بہتر کرنے میں مددگار

دانتوں کا علاج یادداشت کو بہتر کرنے میں مددگار

ایک نئی تحقیق میں یہ بات سامنے آئی ہے کہ دانتوں کا علاج کروانے یا خراب دانتوں کو ٹھیک کرنے سے یادداشت بہتر ہو سکتی ہے۔

ماضی کی کئی تحقیقات نے دانتوں کی بیماریوں کو دل اور دماغ کی بیماریوں سے منسلک کیا ہے۔ ماہرین پہلے ہی یہ تجویز کر چکے ہیں کہ دانتوں کی بہتر صحت بہت سی طبی پیچیدگیوں سے بچنے میں مددگار ثابت ہوتی ہے۔

اب امریکی ماہرین نے چینی لوگوں پر کی جانے والی تحقیق میں یہ انکشاف کیا ہے کہ خاص طور پر بوڑھوں کو دانتوں کی صحت بہتر کرنے یا ان کا علاج کروانے سے یادداشت میں بہتری مل سکتی ہے۔

ایک طبی جریدے میں شائع تحقیق کے مطابق، امریکی ماہرین نے 28 ہزار کے قریب 65 سال یا اس سے زیادہ عمر کے چینی رضاکاروں کے ڈیٹا کا تجزیہ کیا۔ ان تمام افراد نے خراب دانتوں کے امپلانٹس اور مختلف پروسیجرز کروائے تھے۔

ماہرین نے ان رضاکاروں کی یادداشت کا جائزہ لیا اور پھر ان کی یادداشت کا موازنہ ان افراد سے کیا جنہوں نے کبھی بھی دانتوں کا علاج نہیں کروایا۔

نتائج سے پتہ چلا کہ جن بوڑھے افراد نے دانتوں کا علاج کیا تھا، ان کی یادداشت ان لوگوں کے مقابلے میں بہتر تھی جنہوں نے کبھی کسی دانت کا علاج نہیں کروایا۔

ماہرین کے مطابق، دانتوں کی صحت کا یادداشت اور دیگر صحت کے مسائل سے براہ راست تعلق ہے۔ صحت مند دانت اچھی صحت کی علامت ہیں۔ ماہرین نے اس بارے میں مزید تحقیق کی ضرورت پر زور دیا ہے۔