فیک ویڈیو کیس: عظمیٰ بخاری کو ذاتی حیثیت میں پیش ہوکر بیان ریکارڈ کرانے کی ہدایت
لاہور: سیشن عدالت نے صوبائی وزیر عظمیٰ بخاری کی فیک ویڈیو سوشل میڈیا پر وائرل کیے جانے کے مقدمے میں انہیں آئندہ سماعت پر ذاتی حیثیت میں پیش ہوکر بیان ریکارڈ کرانے کی ہدایت کردی۔
لاہور کی سیشن عدالت میں مقدمے کی سماعت ایڈیشنل سیشن جج نصرت علی صدیقی نے کی۔ عدالت نے عظمیٰ بخاری کی ویڈیو لنک کے ذریعے بیان قلمبند کرانے کی درخواست مسترد کردی۔
عظمیٰ بخاری نے جوڈیشل مجسٹریٹ کی جانب سے ذاتی حیثیت میں پیش ہوکر بیان ریکارڈ کرانے کے فیصلے کو چیلنج کیا تھا، تاہم سیشن عدالت نے درخواست خارج کرتے ہوئے انہیں آئندہ سماعت پر عدالت میں پیش ہونے کی ہدایت کردی۔
واضح رہے کہ عظمیٰ بخاری نے فلک جاوید کے خلاف فیک ویڈیو سوشل میڈیا پر وائرل کرنے کے الزام میں این سی سی آئی اے میں مقدمہ درج کرا رکھا ہے۔