امریکی صدر ٹرمپ کا مکہ دفاعی معاہدے کا خیر مقدم، پاکستان ، سعودی عرب اور ترکیہ کی قیادت کی تعریف

مکہ دفاعی معاہدہ: ڈونلڈ ٹرمپ کا پاکستان، سعودی عرب اور ترکیہ کو خراجِ تحسین

واشنگٹن: امریکی صدر ڈونلڈ ٹرمپ نے پاکستان، سعودی عرب اور ترکیہ کے درمیان ہونے والے مکہ مشترکہ دفاعی معاہدے پر مثبت ردعمل کا اظہار کیا ہے۔

ٹرمپ نے اپنے سوشل میڈیا پلیٹ فارم ’ٹروتھ سوشل‘ پر بیان میں کہا کہ انہیں یہ دیکھ کر خوشی ہوئی کہ سعودی عرب، ترکیہ اور پاکستان نے مکہ مشترکہ دفاعی معاہدے پر دستخط کیے ہیں۔

امریکی صدر نے کہا کہ یہ پیش رفت اس بات کی علامت ہے کہ مشرقِ وسطیٰ متحد ہو رہا ہے اور ممالک بالآخر زیادہ مؤثر انداز میں اپنا دفاع کرنے کے قابل ہوں گے۔

ڈونلڈ ٹرمپ نے تینوں ممالک کی قیادت کو مبارکباد دیتے ہوئے معاہدے کو ’’بڑا، جرات مندانہ اور اہم پہلا قدم‘‘ قرار دیا۔

واضح رہے کہ پاکستان، سعودی عرب اور ترکیہ کے درمیان مشترکہ دفاعی معاہدہ 7 اگست کو مکہ مکرمہ میں طے پایا تھا۔ معاہدے کے تحت تینوں ممالک میں سے کسی ایک پر ہونے والے حملے کو تینوں ممالک پر حملہ تصور کیا جائے گا۔

معاہدے پر وزیراعظم شہباز شریف، سعودی ولی عہد شہزادہ محمد بن سلمان اور ترک صدر رجب طیب اردوان نے دستخط کیے تھے۔

پاکستانی دفتر خارجہ نے اس معاہدے کے دائرہ کار میں مزید توسیع کا عندیہ دیتے ہوئے کہا تھا کہ امن و سلامتی سے متعلق یہ تعاون صرف تین ممالک تک محدود نہیں ہے۔