پی پی ایل کی خشکی اور سمندر کے کنارے نئے ہائیڈرو کاربن ذخیرے کی دریافت

سجاول میں پی پی ایل کی اہم گیس دریافت، چلتن فارمیشن میں پہلی بار ہائیڈروکاربن ملا

کراچی: پاکستان پیٹرولیم لمیٹڈ (پی پی ایل) نے ضلع سجاول میں واقع اپنے آپریٹڈ سیرانی بلاک کے دریافت شدہ کنویں ڈولفن ایکس ون سے گیس کی اہم دریافت کرلی۔

پی پی ایل کے مطابق یہ جراسک دور کی لوئر انڈس بیسن کی چلتن فارمیشن سے ہائیڈروکاربن کی پہلی دریافت ہے، جس سے دلدلی زمینی علاقوں اور ان سے ملحق کم گہرے سمندری علاقوں میں مزید دریافتوں کے امکانات پیدا ہوگئے ہیں۔

کمپنی کے مطابق یہ علاقہ دشوار گزار جغرافیائی صورتحال کے باعث طویل عرصے تک دریافت کے لیے ناقابلِ رسائی تصور کیا جاتا رہا۔ ڈولفن ایکس ون کی کھدائی 17 اپریل 2026 کو شروع کی گئی اور کنویں کو چلتن فارمیشن میں ہائیڈروکاربن کے امکانات جانچنے کے لیے 3,850 میٹر کی گہرائی تک کھودا گیا۔

کھدائی کے نتائج اور وائر لائن لاگز کی بنیاد پر ہائیڈروکاربن پر مشتمل زون کی نشاندہی ہوئی۔ جانچ کے دوران چلتن فارمیشن سے 0.942 ایم ایم ایس سی ایف ڈی کی شرح سے اعلیٰ معیار کی گیس حاصل ہوئی، جس کی حرارتی قدر 1000 بی ٹی یو فی ایس سی ایف اور ویل ہیڈ فلوئنگ پریشر 211 پی ایس آئی جی ریکارڈ کیا گیا۔

پی پی ایل کے مطابق سیرانی بلاک میں کمپنی 75 فیصد ورکنگ انٹرسٹ کے ساتھ آپریٹر ہے، جبکہ جوائنٹ وینچر پارٹنر گورنمنٹ ہولڈنگز پرائیویٹ لمیٹڈ کا حصہ 25 فیصد ہے۔

کمپنی کا کہنا ہے کہ ڈولفن ایکس ون کی کامیاب کھدائی اور جانچ سے چلتن لائم اسٹون میں ایک نئے ہائیڈروکاربن پلے کی دریافت ہوئی ہے، جو پاکستان کے کم گہرے سمندری علاقوں میں مستقبل کی تلاش کے لیے بھی اہم پیش رفت ہے۔