جب دنیا بھر میں حالات خراب تھے، اس وقت مریم نواز نے 11 ارب روپے کا جہاز خریدا: حافظ نعیم کی تنقید

مہنگائی اور پیٹرولیم لیوی کے خلاف جماعت اسلامی کے مختلف شہروں میں دھرنے جاری

جماعت اسلامی کی جانب سے مہنگائی اور پیٹرولیم لیوی کے خلاف ملک کے مختلف شہروں میں دھرنے جاری ہیں۔ امیر جماعت اسلامی حافظ نعیم الرحمان نے دھرنے کے شرکا سے خطاب کرتے ہوئے حکومت کو شدید تنقید کا نشانہ بنایا۔

حافظ نعیم الرحمان نے کہا کہ اس وقت مسلم لیگ ن کی حکومت کھوکھلی ہوچکی ہے اور حکمرانوں کی عیاشیوں کا بوجھ عوام اٹھا رہے ہیں۔ ان کا کہنا تھا کہ جب دنیا بھر میں معاشی حالات خراب تھے تو حکومت نے 11 ارب روپے کا جہاز خرید لیا۔

انہوں نے حکومت سے مطالبہ کیا کہ عوام سے بات کی جائے اور پیٹرولیم لیوی ختم کی جائے۔ حافظ نعیم الرحمان کا کہنا تھا کہ یہ عوام کا جائز مطالبہ ہے اور اب عوام کو مزید دبایا نہیں جاسکتا، اس سلسلے کو ختم کرنا ہوگا۔

امیر جماعت اسلامی نے کہا کہ حیدرآباد میں بھی دھرنا شروع ہوچکا ہے اور آج اس کا تیسرا دن ہے۔ ان کا کہنا تھا کہ جن لوگوں نے ملکی معیشت کی ٹریفک جام کی، وہ اب دھرنوں کی وجہ سے ٹریفک جام ہونے کی شکایت کر رہے ہیں۔ انہوں نے کارکنوں پر زور دیا کہ دھرنا برقرار رکھا جائے اور احتجاج کا دائرہ مزید بڑھایا جائے۔

حافظ نعیم الرحمان نے وزیراعلیٰ پنجاب مریم نواز کو بھی تنقید کا نشانہ بناتے ہوئے الزام عائد کیا کہ صوبے کے تعلیمی نظام کو تباہ کرکے رکھ دیا گیا ہے۔ انہوں نے خبردار کیا کہ اگر نوجوانوں میں غصہ بڑھ گیا تو حالات قابو سے باہر ہوسکتے ہیں۔

انہوں نے مزید الزام عائد کیا کہ شوگر مافیا حکومت کے ساتھ ملی ہوئی ہے۔ ان کا کہنا تھا کہ حکومت نے چینی کی قیمت کم کرنے کا وعدہ کیا تھا، لیکن اس کے برعکس چینی مزید مہنگی ہوگئی۔