عمران کیلئے ریلیف کا تسلسل پریس کانفرنس اور سیاسی بیان نہ دینے سے مشروط

عمران خان سے اہل خانہ کی ملاقاتیں ایس او پیز پر عملدرآمد سے مشروط، ذرائع

اسلام آباد: باخبر ذرائع کے مطابق جیل میں قید پی ٹی آئی کے بانی عمران خان سے اہل خانہ کی ملاقاتوں کا سلسلہ طے شدہ معیاری ضابطہ کار (ایس او پیز) پر سختی سے عملدرآمد سے مشروط ہے۔ ذرائع کے مطابق ملاقات کے بعد پریس کانفرنس کرنے یا سیاسی بیانات جاری کرنے سے گریز کرنا بھی ان شرائط میں شامل ہے۔

ذرائع کے مطابق عمران خان کی بہن نورین خانم کو منگل کے روز ایک بار پھر ان سے ملاقات کی اجازت دی گئی۔ چند ہی روز کے دوران یہ عمران خان کے ساتھ ان کی دوسری ملاقات ہے، جسے پی ٹی آئی کے بانی اور ان کے خاندان کے لیے ایک حوصلہ افزا پیش رفت قرار دیا جا رہا ہے۔

ذرائع کا کہنا ہے کہ اہل خانہ سے ملاقاتوں پر عائد پابندیوں میں نرمی کا سلسلہ اس وقت تک جاری رہ سکتا ہے جب تک طے شدہ ایس او پیز پر عمل کیا جاتا رہے۔ ان شرائط کے تحت ملاقات کرنے والے رشتہ داروں کو ملاقات کے بعد پریس کانفرنس یا سیاسی بیانات سے گریز کرنا ہوگا۔

ذرائع کے مطابق یہی مفاہمت سپریم کورٹ میں ہونے والی کارروائی کے دوران بھی سامنے آئی، تاہم یہ معاملہ طویل عرصے سے متنازع رہا ہے۔ اہل خانہ کے بعض افراد عمران خان سے ملاقات کے بعد میڈیا سے گفتگو کرتے رہے، جبکہ ان سے منسوب بعض بیانات بعد ازاں سوشل میڈیا اکاؤنٹس پر بھی سامنے آتے رہے۔

ذرائع کا کہنا ہے کہ ان بیانات میں اکثر اسٹیبلشمنٹ پر شدید تنقید کی جاتی تھی، جس کے باعث اہل خانہ کی ملاقاتوں کے تسلسل کے حوالے سے پیچیدگیاں پیدا ہوتی رہیں۔

ذرائع نے عمران خان کی بہن ڈاکٹر عظمیٰ کی ایک سابقہ ملاقات کا حوالہ دیتے ہوئے کہا کہ ملاقات کے بعد انہوں نے مبینہ طور پر سخت الفاظ میں عوامی گفتگو کی، حالانکہ اس سے قبل ایسی گفتگو نہ کرنے کی یقین دہانی کرائی گئی تھی۔ اسی طرح علیمہ خان بھی عمران خان سے ملاقاتوں کے بعد متعدد مرتبہ میڈیا سے گفتگو کرتی رہی ہیں۔

ذرائع کے مطابق تازہ پیش رفت سے ظاہر ہوتا ہے کہ حکام اہل خانہ کو عمران خان سے زیادہ باقاعدگی سے ملاقات کی اجازت دینے پر آمادہ ہیں، تاہم اس کے لیے طے شدہ ایس او پیز کی پابندی ضروری ہوگی۔

ذرائع نے کہا کہ اگر اہل خانہ ملاقاتوں کے بعد پریس کانفرنس سے گریز کریں اور جیل سے عمران خان سے منسوب کوئی متنازع سیاسی بیان سامنے نہ آئے تو توقع ہے کہ خاندانی ملاقاتیں پہلے عائد پابندیوں کے بغیر جاری رہ سکیں گی۔ اس سے عمران خان اور ان کے خاندان کو ریلیف ملنے کے ساتھ باقاعدہ خاندانی رابطہ برقرار رکھنے کا موقع بھی مل سکتا ہے۔