محمد عرفان نے بھی انٹرنیشنل کرکٹ کو خیرباد کہہ دیا

محمد عرفان نے بھی انٹرنیشنل کرکٹ کو خیرباد کہہ دیا

پاکستانی کرکٹ ٹیم کے طویل القامت فاسٹ بولر محمد عرفان نے انٹرنیشنل کرکٹ سے ریٹائرمنٹ کا اعلان کر دیا ہے۔ انہوں نے سماجی رابطے کی ویب سائٹ ایکس (سابقہ ٹویٹر) پر اپنے فیصلے کا اعلان کیا۔

اپنے پیغام میں محمد عرفان نے کہا کہ وہ انٹرنیشنل کرکٹ کو الوداع کہہ رہے ہیں اور اس سفر میں ساتھ دینے والے ساتھی کھلاڑیوں، کوچز اور مداحوں کا دل سے شکر گزار ہیں۔ انہوں نے مزید کہا کہ کرکٹ نے انہیں بہت کچھ دیا، اور وہ ہمیشہ اس کھیل کے لیے سپورٹ فراہم کرتے رہیں گے۔

محمد عرفان نے اپنے انٹرنیشنل کیریئر میں 4 ٹیسٹ، 60 ون ڈے اور 22 ٹی 20 میچز میں پاکستان کی نمائندگی کی۔ ان کا کہنا تھا کہ یہ فیصلہ ان کے لیے آسان نہیں تھا لیکن اب وہ آگے بڑھنے کے لیے تیار ہیں۔

یہ بات قابل ذکر ہے کہ حالیہ دنوں میں عرفان تیسرے پاکستانی کرکٹر ہیں جنہوں نے انٹرنیشنل کرکٹ کو خیرباد کہا۔ ان سے پہلے محمد عامر اور عماد وسیم نے بھی اپنی ریٹائرمنٹ کا اعلان کیا تھا۔

محمد عرفان کے اس اعلان کے بعد کرکٹ حلقوں میں ان کے کیریئر اور خدمات کو خراج تحسین پیش کیا جا رہا ہے۔