جوس میں پیشاب ملانے والا دکاندار گرفتار
نئی دہلی: بھارتی ریاست اترپردیش کے شہر غازی آباد میں ایک انتہائی حیران کن اور مکروہ واقعہ پیش آیا، جس میں جوس اسٹال پر کام کرنے والے دکاندار کو جوس میں پیشاب ملانے کے سنگین الزام میں گرفتار کر لیا گیا۔ مقامی ذرائع کے مطابق دکاندار کی شناخت عامر خان کے نام سے ہوئی ہے، جو غازی آباد کے علاقے میں پھلوں کے جوس کا اسٹال لگاتا تھا۔
بھارتی میڈیا کی رپورٹ کے مطابق یہ واقعہ اس وقت سامنے آیا جب کچھ گاہکوں نے جوس کی غیر معمولی رنگت اور ذائقے پر شک ظاہر کیا۔ یہ شک پیدا ہونے کے بعد جوس خریدنے والے گاہکوں میں بے چینی پھیل گئی، جس کے نتیجے میں وہاں ہجوم جمع ہو گیا اور دکاندار سے تکرار شروع ہوگئی۔
شک کی بنیاد پر مقامی افراد نے اسٹال کی تلاشی لی اور اس دوران وہاں سے ایک بوتل برآمد ہوئی، جس میں دکاندار کا پیشاب موجود تھا۔ ہجوم کی جانب سے دکاندار پر شدید اعتراضات کیے گئے اور معاملہ مقامی پولیس تک پہنچا دیا گیا۔
پولیس کی ابتدائی تفتیش کے دوران دکاندار نے اعتراف کیا کہ وہ بوتل واقعی اس کا پیشاب تھا اور اس نے یہ بھی تسلیم کیا کہ وہ جوس میں اپنے پیشاب کے چند قطرے ملا دیا کرتا تھا۔ تاہم، جب پولیس نے اس گھناؤنے فعل کی وجہ پوچھی تو دکاندار کوئی خاطر خواہ وضاحت نہ دے سکا۔ پولیس اس معاملے کی ہر زاویے سے تفتیش کر رہی ہے تاکہ دکاندار کے اس غیر اخلاقی عمل کی مکمل حقیقت سامنے آ سکے۔
غازی آباد میں پیش آنے والے اس واقعے کے بعد مقامی لوگوں میں شدید غم و غصہ پایا جاتا ہے۔ اس واقعے نے نہ صرف علاقے میں ہلچل مچا دی بلکہ بھارت بھر میں سوشل میڈیا پر بھی شدید تنقید کا سامنا کیا جا رہا ہے۔ عوامی حلقوں کی جانب سے دکاندار کو سخت سزا دینے کا مطالبہ بھی کیا جا رہا ہے۔
یہ پہلا موقع نہیں ہے جب بھارت میں ایسے گھناؤنے واقعات سامنے آئے ہوں۔ اس سے قبل، گزشتہ برس ریاست تلنگانہ میں فالودہ بنانے والا ایک دکاندار بھی پکڑا گیا تھا، جو اپنے فالودے میں اپنا اسپرم ملا کر بیچا کرتا تھا۔ یہ واقعات اس بات کی نشاندہی کرتے ہیں کہ کچھ لوگ پیسے کمانے کے لیے کس حد تک اخلاقی زوال کا شکار ہو چکے ہیں۔
