نیپال: سیلاب سے ہلاکتیں 162 ہوگئیں، غیر ملکیوں سمیت 570 افراد تاحال لاپتا

کھٹمنڈو: نیپال میں شدید سیلاب اور مٹی کے تودوں کے باعث ہلاکتوں کی تعداد 162 ہوگئی، جبکہ 570 سے زائد افراد تاحال لاپتا ہیں۔

نیپال کے ضلع راسووا میں اچانک آنے والے سیلابی ریلے کے بعد امدادی کارروائیاں جاری ہیں۔ سیاحتی حکام کے مطابق لاپتا افراد میں 400 سے زائد غیرملکی شہری بھی شامل ہیں، جن میں 142 بھارتی، 54 امریکی، 34 آسٹریلوی، 33 برطانوی، 24 کینیڈین، 17 ملائیشین اور 53 یوکرینی شہری شامل ہیں۔

حکام کے مطابق جنوبی کوریا، جنوبی افریقہ، پرتگال اور نیدرلینڈز سے تعلق رکھنے والے بعض افراد بھی لاپتا ہیں، جن کی تلاش جاری ہے۔

دوسری جانب چینی سرکاری میڈیا کے مطابق تبت کے علاقے گیرونگ میں مٹی کے تودے گرنے کے بعد 558 افراد لاپتا ہیں، جن میں 260 غیرملکی شہری شامل ہیں، جبکہ حادثات میں 3 افراد ہلاک ہوئے ہیں۔

چینی میڈیا کے مطابق سیلاب اور مٹی کے تودوں سے سرحدی علاقے میں گھروں، سڑکوں اور بجلی کے منصوبوں کو شدید نقصان پہنچا ہے۔