میدان میں بھارتی کھلاڑیوں سے دوستی کیوں؟ معین خان نے موجودہ پاکستانی ٹیم کے رویے پر سخت تنقید
لاہور:پاکستانی کرکٹ ٹیم کے سابق وکٹ کیپر معین خان نے موجودہ کھلاڑیوں پر بھارتی پلیئرز کے ساتھ میدان میں "زیادہ دوستانہ” رویے کے باعث ناراضی کا اظہار کیا ہے۔ اداکارہ اُشنا شاہ کے ٹاک شو میں بات کرتے ہوئے انہوں نے کہا کہ "میرے دور میں حریف ٹیم کے ساتھ ایسا ربطہ نہیں تھا۔”
معین خان نے شو میں کہا، "جب میں موجودہ کھلاڑیوں کو بھارتی پلیئرز کے ساتھ ہنستے کھیلتے یا ان کے بیٹ چیک کرتے دیکھتا ہوں تو دکھ ہوتا ہے۔ ہماری ٹیم کبھی بھارت سے آگے تھی، آج وہ ہم پر حاوی ہیں۔” انہوں نے ماضی کے کھلاڑیوں جیسے وسیم اکرم، وقار یونس، اور شعیب اختر کی مثال دیتے ہوئے کہا، انہیں کبھی حریفوں کے ساتھ سیلفیاں بناتے یا بیٹ کا جائزہ لیتے نہیں دیکھا گیا۔”
سابق کرکٹر نے موجودہ ٹیم پر تنقید کرتے ہوئے کہا، یہ کھلاڑی نادانستہ طور پر منفی پیغامات دے رہے ہیں۔ جب آپ میدان میں حریف کے ساتھ زیادہ دوست بن جاتے ہیں تو وہ آپ کو ذہنی طور پر کمزور سمجھنے لگتے ہیں۔” ان کا کہنا تھا کہ ماضی میں ہارنے کے بعد بھی کھلاڑی جارحانہ انداز اپناتے تھے، لیکن اب یہ رویہ ختم ہوگیا ہے۔
میزبان اُشنا شاہ کے سوال "آج کل پاکستانی کھلاڑی ویرات کوہلی سمیت بھارتی پلیئرز کے ساتھ تصاویر کیوں بنوا رہے ہیں؟” پر معین خان نے جواب دیا، "ہمارے دور میں بھی بھارتی کھلاڑیوں سے اچھے تعلقات تھے، لیکن میدان پر ہم نے کبھی انہیں ‘فرینڈ’ نہیں سمجھا۔” انہوں نے زور دے کر کہا کہ "کھیل کے میدان میں حریف کو دوست نہیں، مقابل سمجھنا چاہیے۔”
معین خان نے بتایا کہ وہ اور وسیم اکرم اکثر کھلاڑیوں کو اس رویے کے بارے میں سمجھاتے ہیں، لیکن موجودہ نسل "جذباتی لڑائی” بھول چکی ہے۔ ان کا کہنا تھا، "وسیم بھی اکثر کہتے ہیں کہ آج کے کھلاڑیوں میں وہ آگ نہیں رہی جو ہمارے دور میں تھی۔
سابق وکٹ کیپر نے کہا، "ہم نے بھارت کے خلاف جو برتری 90 کی دہائی میں قائم کی تھی، وہی آج تک ہماری واحد کامیابی ہے۔ انہوں نے ہماری کمزوریوں سے فائدہ اٹھا کر اپنی ٹیم کو مضبوط بنایا ہے۔”
معین خان کی یہ تنقید اس وقت سامنے آئی ہے جب حالیہ میچوں میں پاکستانی کھلاڑیوں کے بھارتی پلیئرز کے ساتھ دوستانہ رویوں پر سوشل میڈیا پر بھی بحث جاری ہے۔
