ورلڈکپ کے دوران پاکستان اور نیوزی لینڈ 9 مرتبہ آمنے سامنے آئے

ہفتے کے روز بنگلورو میں پاکستان اور نیوزی لینڈ کا آمنا سامنا ہوگا، شیڈیول کے مطابق میچ ساڑھے10 بجے شروع ہوگا البتہ ہفتے کی دوپہر بنگلورو میں بارش کی پیشگوئی بھی کی گئی ہے۔ پاکستان کو سیمی فائنل میں رسائی کیلئے نیوزی لینڈ سے بڑے مارج سے جیت کی ضرورت ہے تاہم بارش کی صورت میں دونوں ٹیموں کو ایک ایک پوائنٹ دیا جائے گا اور اگر ایسا ہوتا ہے تو پاکستان کے سیمی فائنل میں پہنچنے کے چانسز انتہائی کم ہو جائیں گے۔

آئی سی سی ون ڈے ورلڈکپ مقابلوں میں پاکستان اور نیوزی لینڈ کی ٹیمیں 9 بار آمنے سامنے آچکی ہیں اور ان مقابلوں میں پاکستانی کرکٹ ٹیم کا پلڑا بھاری رہا ہے۔ تاریخ دیکھی جائے تو 2011 میں نیوزی لینڈ نے آخری بار پاکستان کو ورلڈکپ مقابلوں میں شکست سے دوچار کیا تھا جبکہ پاکستان نے 2019 میں کیویز کو شکست کا مزہ چکھایا تھا۔

خیال رہے کہ پوائنٹس ٹیبل پر پاکستان 7 میچز میں 3 میچز جیت کر 6 پوائنٹس کے ساتھ پانچویں جبکہ نیوزی لینڈ 7 میچز میں 4 فتوحات کے بعد 8 پوائنٹس کے ساتھ چوتھی پوزیشن پر قابض ہے۔ آئی سی سی ون ڈے ورلڈکپ مقابلوں میں 1983 سے دونوں ٹیمیں مدمقابل آرہی ہیں جہاں نے پاکستان نے 9 جبکہ نیوزی لینڈ نے صرف 2 میچز جیت رکھے ہیں۔

دوسری جانب نیوزی لینڈ کی کرکٹ ٹیم کے کئی کھلاڑی بھی انجری کا شکار ہیں اور اس فہرست میں اب فاسٹ بولر میٹ ہنری کا بھی اضافہ ہو گیا ہے جو کہ جنوبی افریقا کے خلاف میچ میں ہیمسٹرنگ انجری کا شکار ہو گئے تھے۔ ان کو کور کرنے کیلئے فاسٹ بولر کائل جیمی سن کو بھارت بلا لیا گیا ہے۔کیوی کھلاڑی جمی نیشم بھی کلائی پر گیند لگنے کے باعث انجری کا شکار ہو گئے تھے مزید برآں لوکی فرگوسن، مارک چیپمین اور کین ولیمسن پہلے ہی انجریز کا شکار ہیں۔